Хууда ажыл-агыйлыглар немежип турар

Чинчи, Айдыс Монгуштар Бии-Хемниң Аржаан суурда боттарының дузалал ажыл-агыйын тудуп, школа назыны четпээн ийи ажы-төлүн кижизидип өстүрүп турарлар. Олар “Социал керээ” күрүне программазының деткимчези-биле бызаалыг инекти садып алыр аргалыг болган.
Чинчи боду мал эмчизи мергежилдиг болгаш, мал азыраарынга сундулуг.

“Өөм ээзи-биле хууда дузалал ажыл-агыйлыг болуп, ону сайзырадыр күзелдиг турган бис. Боттарывыс ол талазы-биле дуржулгалыг болгаш, уруг-дарыывысты мал ажыл-агыйынга сонуургалдыг кылдыр өөредип-кижизидип турар бис. Социал деткимчени алгаш, акша-көпеек талазы-биле нарын айтырыгларывысты шиитпирлеп алыр аргалыг апарган бис. Сүдүвүстү, сметананы “Аржаан” сүт-бараан фермазынче дужаап, садыг-ярмаркаларга идепкейлиг киржип турар бис” — деп, Чинчи Монгуш дуржулгазы-биле үлешкен.

Шак-ла ындыг дузалал ажыл-агыйын ажыдып алыксап турарлар Бии-Хемде чылдан чылче немежип турар. Бо чылын Бии-Хемниң сес чурттакчызы бодунуң хууда дузалал ажыл-агыйын хөгжүдери-биле, комиссияны эрткен. Оларның ийизи ногаа тарыыр хууда ажыл-агыйын ажыдар дээн.

/ Бистиң корр.

"Шын" №37 2023 чылдың май 23