Дүүн, август 2-де, К. И. Чуковский аттыг уругларның ном саңынга Россия Федерациязының культуразының алдарлыг ажылдакчызы, Тываның алдарлыг ажылдакчызы, Тываның улустуң чогаалчызы, билдингир журналист Артык Ховалыгның «Дээрим – чаглаа, Черим – олбуу – бөдей Өөм» деп тоол чугаалар болгаш шүлүктер номунуң таныштырылгазы болган.
Москвага чоокта чаа парладып үндүрген ном таныштырылгазынга Тываның чогаалчылары, журналистери, эртемденнери, ном саңының бичии номчукчулары болгаш өскелер-даа киришкен.
Чеди чажыт ээзи Чанчып дээр оол дугайында тоол тыва эр кижиниң мөзү-бүдүжүнүң дээре дээн шынарларын – дидимин, шынчызын, соруктуун хевирлээринге үлегер-майык болур. Өг-бүле кижизидилгезинге ужурларны, чаңчыл-сагылганы төөгүден салгал дамчаан улустуң мергенин чараш, бүзүренчиг бижип көргүскен.
Аалчылар хуулгаазын аъттыг Чанчып тоолун уругларга сөңнээни дээш өөрүшкүзүн илереткен.
Авторнуң 18 дугаар номунда парлаттынган Чеди чажыт ээзи Чанчып деп оол дугайында тоол «Россия чоннарының тоолу» деп 93 авторнуң чогаалы кирген чыындының «Улусчу ужурлар, тоолчургу чугаалар» деп эгеде кирген.
Тываның улустуң чогаалчызының уйнуу Мирослава Санчес сес харлыындан эгелеп кырган-авазының номнарының чурук каасталгазын кылып турар.
К. И. Чуковский аттыг уругларның ном саңының директору Сылдысмаа Лопсан хүндүлүг аалчызынга ак кадаан сунуп, дамчыткан номнары дээш өөрүп четтиргенин илередип, суй белээн сунган.
Ном саңының директору Артык Ховалыг-биле чогаалчының «Коңгулуур ыры», «Өндүр өкпең өң», «Дээрим – чаглаа, Черим – олбуу – бөдей Өөм», «Хуулгаазын аът» деп номнарын, «Чонунга алгадыр чолдуг» эртем-нептерелдиг очеригин электроннуг хевирже шилчидер дугайында керээге атты салганнар. Бо номнар «Тыва номчуп тур» деп электроннуг ном саңының даңзызынче кирер.
Москвада Тыва чогаалчылар салбыры Россияда чарлаттынган Өг-бүле чылынга тураскааткан ужуражылганы ном саңынга эрттирген. Чурттуң төвүнде чурттап турар тыва чогаалчылар аныяк-өскен уксаа салгалын, чер-чуртунуң төөгүзүн билир кылдыр кижизидикчи, ада-чуртчу уткалыг чогаалдарны бижип, суртаалдап турарлар.
ТМГ-медээлер.
Шончалай ХОВАЛЫГНЫҢ тырттырган чуруктары.
