2022 чылдың эгезинден тура Тываның эмчи албан черлеринче “Көдээ черниң эмчизи” федералдыг программа ёзугаар Россияның аңгы-аңгы регионнарындан 24 эмчини хаара туткан. Оларның алдызы Эрзин, Өвүр, Чеди-Хөл, Кызыл, Таңды болгаш Каа-Хем кожууннарже ажылдаары-биле үнүпкен.
Үстүнде федералдыг программа ёзугаар көдээ суурларже ажылдап чоруп турар эмчилерге чаңгыс удааның деткимче акшазы болур 2 сая рубльди бээри көрдүнген. Өске регионнардан Тываже кээп турар тускай мергежилдиг эмчи специалистерге база бир немелде деткимче акшазы 200 муң рубльди база бээр. Ол акшаны хары угда бербес, а беш чыл дургузунда республика бюджединден бичиилеп төлээр. Шак ындыг регион деңнелинде деткимчени бо чылдың эгезинден тура берип эгелей берген.
Шак ындыг деткимчени ординатура биле специалитет дооскан специалистер, өске регионнарга ажылдап тургаш, Тывада катап чанып келген, республиканың эмчи албан черлеринде бо чылын ажылдап кирип алган эмчилер ап болур. Күрүнеден берип турар бо деткимчени алыр мурнунда эмчилер ажылдап турары эмчи албан чери-биле эвээш дизе, беш чылдың керээзин чарып алыр ужурлуг.
Эрткен чылын “Көдээ черниң эмчизи”, Көдээ черниң фельдшери” программалар-биле Тываның суурларынче 29 эмчини хаара туткан.
2022 чылдың дургузунда бо ийи программа ёзугаар республиканың кожуун эмнелгелеринче ам-даа 30 эмчини чорудары планнаттынган.
ТР-ниң Кадык камгалал яамызының медээлери-биле.