Тываның Чазак бажыңынга Чоннуң чаңгыс деминиң хүнүнүң бүдүүзүнде күш-ажылчы шылгараңгай чедиишкиннерлиг чаңгыс чер чурттугларывысты, аңгы-аңгы адырларның, корум-чурум камгалаар органнарның башкарыкчы специалистерин болгаш хоочуннарын, аңгы-аңгы омак-сөөк чоннарның болгаш салгалдарның төлээлеринге күрүне шаңналдарын тыпсыр езулал болуп эрткен.
Тываның Баштыңы Владислав Ховалыг чуртувустуң болгаш Россияның бүгү чонунуң хостуг келир үезин камгалап, амгы шенелделиг моондактарны эртеринге хөй националдыг чонувустуң чаңгыс демнии болгаш бир демнежилгези дег кол чүве чок болган дээрзин бөгүн бадыткаанын чугаалаан. Республиканың чону ырак-чоокта регионнарга ачы-дузазын көргүзүп, олардан деткимчени ап, удур-дедир найыралчы харылзааны тутканы – чоннуң чаңгыс деминде. “Бо кыжын Шагаан-Арыг хоорайның чылыдылга-энергетика төвүнүң котельнаязынга озал-ондакты дарый чайлатчырынга 5 аңгы регион специалистерин чорудуп, тускай дериг-херекселдер-биле дузалаан. Чайның халыынныг изиг хүннеринде республиканың арга-арыгларында өрттерни өжүреринге Хакасия, Красноярск база Забайкалье крайлардан, Томск болгаш Новосибирск областардан өртчүлер киришкен, ОБЯ-ның болгаш Камгалал яамызының авиациязы хаара туттунган. Республиканың чурттакчы чонунуң – аныяк волонтёрларның, улусчу дружиналар эки турачыларының, сайгарлыкчыларның, эмчилерниң, башкыларның, социал ажылдакчыларның, спортчуларның, культура ажылдакчыларының демниг киржилгези-биле өрттер чоогунда суурларны өрттен камгалап алган бис” – деп, Тываның Баштыңы онзалап демдеглээш, омак-сөөк чоннар хөй, төрээн чуртувус чаңгыс дээрзин айыткан.
Байырлал хүнүнүң бүдүүзү-биле байырны чедирип, республиканың күрүне шаңналдарын тывыскан.
Кызыл хоорай талазы-биле полицияның ведомстводан дашкаар камгалал ротазының взвод салбырының улуг полицейжизи, полицияның прапорщиги Максим Игоревич Кодымскийге албан-хүлээлгезин ак сеткилдиг күүседип, бедик мергежилин көргүскени дээш Тыва Республиканың Баштыңының өөрүп четтириишкин бижиин тывыскан.
Россияның ОБЯ Тыва Республикада кол эргелелиниң өрт өжүрер албанының смена дежурныйының начальнигиниң улуг дузалакчызы, иштики албанның майору Айдың Херелович Ооржакты албан-хүлээлгезин ак сеткилдиг күүсеткени база бедик профессионал чоруу дээш Тыва Республиканың Баштыңының Хүндүлел бижии-биле шаңнаан.
ИХЯ-ның Тыва Республикада Истелге эргелелиниң хоочуннар эге организациязының кежигүнү, халажылгада юстицияның подполковниги Чечен Санчай-ооловна Шаравиини иштики херектер органнарынга хөй чылдарда ажыл-албаны болгаш идепкейжи хөй-ниити ажылы дээш Тыва Республиканың Баштыңының Хүндүлел бижии-биле шаңнаан.
Ажаалга банкызы ПАН-ның 8592 дугаарлыг Кызылда салбырының башкарыкчызы Алина Марталайевна Таспанчикти республиканың социал-экономиктиг хөгжүлдезинге киирген үлүг-хуузу дээш Тыва Республиканың Баштыңының Хүндүлел бижии-биле шаңнаан.
Кызыл хоорайның «Восточный» суд участогунуң халажылгада эптештирилге судьязы Роланда Геннадьевна Иргитке суд системазынга хөй чылдарда ак сеткилдиг ажылдааны дээш “ССРЭ-ниң составынче Тыва Арат Республиканың эки тура-биле каттышканының 80 чылы” юбилейлиг медальды тывыскан.
Барыын-Хемчик кожууннуң контроль-саналга органының даргазы Орлан Мандат-оолович Кара-Сал Тыва Республиканың социал-экономиктиг хөгжүлдезинге үлүг-хуузу, хөй чылдарда ак сеткилдиг ажылы дээш “Тыва Республиканың алдарлыг ажылдакчызы” хүндүлүг атка төлептиг болган.
Федералдыг казначействонуң Тыва Республикада эргелелиниң 3 дугаар территориалдыг орган салбырының килдис начачальниги Лирьяна Онгай-ооловна Кара-Монгушка экономика адырынга хөй чылдарда ак сеткилдиг ажылы база саң-хөө ажыл-чорудулгазы дээш “Тыва Республиканың алдарлыг экономизи” хүндүлүг атты тывыскан.
Федералдыг суд приставтар албанының Тыва Республикада эргелелиниң Кызыл хоорайның суд приставтары тускайжыттынган килдистиң улуг суд приставы – килдис начальниги, иштики албанның капитаны Анатолий Александрович Монгеге хөй чылдарда төлептиг ажыл албаны дээш “Тыва Республиканың алдарлыг ажылдакчызы” хүндүлүг атты тывыскан.
Дамба Хүреш-оол аттыг уругларның уран чүүл школазының “Хөөмей” клазының башкызы Сиома Адыг-оолович Докпакка культура болгаш уран чүүлдү хөгжүдеринге үлүг-хуузу база хөй чылдарда ак сеткилдиг ажылы дээш “Тыва Республиканың культуразының алдарлыг ажылдакчызы” хүндүлүг атты тывыскан.
Тываның күрүне университединиң ада-чурт төөгүзү, археология болгаш документ чорудар кафедраның доцентизи Виктория Чарызоловна Монгушка дээди өөредилге системазынга хөй чылдарда ак сеткилдиг ажылы дээш “Тыва Республиканың өөредилгезиниң алдарлыг ажылдакчызы” хүндүлүг атты тывыскан.
Республиканың 1 дугаар эмнелгезиниң кол эмчизиниң хирургия айтырыгларының талазы-биле оралакчызы, нейрохирург эмчи Болат Комбуржапович Ховалыгга кадык камгалал адырынга онза ачы-хавыяазы болгаш хөй чылдарда ак сеткилдиг күш-ажылы дээш “Тыва Республиканың алдарлыг эмчизи” хүндүлүг атты тывыскан.
Улуг-Хем кожууннуң спорт школа директору Алексей Алдын-оолович Шойдунга күш-культура болгаш спорттуң хөгжүлдезинге үлүг-хуузу, хөй чылдарда ак сеткилдиг күш-ажылы дээш “Тыва Республиканың күш-культура болгаш спортунуң алдарлыг ажылдакчызы” хүндүлүг атты тывыскан.
Күрүне албанының хоочуну Татьяна Дожулдеевна Монгушту Тыва Республиканың хөгжүлдезинге үлүг-хуузу база хөй чылдарда ак сеткилдиг күш-ажылы дээш “Тыва Республиканың мурнунга ачы-хавыяазы дээш” Тыва Республиканың медалы-биле шаңнаан.
Тыва Республиканың медицина албан камгаладылгазының территориалдыг фондузунуң директорунуң бирги оралакчызы Татьяна Ильинична Полежаевага кадык камгалал системазының хөгжүлдезинге үлүг-хуузу болгаш хөй чылдарда ак сеткилдиг күш-ажылы дээш “Шылгараңгай күш-ажылы дээш” Тыва Республиканың медалы-биле шаңнаан.
ТР-ниң Чазааның парлалга албаны.
Чиңгис СААЯНЫҢ тырттырган чуруктары.
“Шын” №85 2024 чылдың ноябрь 6
