Бөгүн, Май 1-де – Частың болгаш күш-ажылдың байырлалында, Тыва Республиканың профэвилелдер федерациязының активи Тываның Чазак Даргазының социал политика талазы-биле оралакчызының хүлээлгезин күүседип турар Орлан Сарыглар-биле ужуражылганы эрттирген. Аңаа ТР-ниң профэвилелдер федерациязының база республиканың адыр аайы-биле профэвилелдер организацияларының удуртукчулары, ТР-ниң Күш-ажыл болгаш социал политика яамызының төлээлери илеткелдерни кылган.
Ужуражылганың кол темазы — социал эштежилгени хөгжүдери, тускай шериг операциязының киржикчилеринге болгаш оларның өг-бүлелеринге деткимче дугайында. Ол ышкаш республиканың чурттакчыларының күш-ажылчы эргелерин деткиир талазы-биле санал-оналдарны киирерин сайгарган.
Ужуражылга үезинде ТШО-нуң киржикчилеринге деткимчелерниң хевирлериниң дугайында, ол ышкаш күш-ажылчы кижилерге деткимчениң эргежок чугулазын сайгарып чугаалашкан.
Кол айтырыгны сайгарып чугаалашкан соонда, Тываның профэвилелдер федерациязының даргазы Галина Сюрюн республиканың адыр аайы-биле профэвилелдериниң кежигүннериниң санал-оналдарын дыңнаткаш, Тываның ажыл-ишчи коллективтерин Частың болгаш күш-ажылдың байырлалы-биле байыр чедирген: «Күш-ажылчы кижи бүрүзүнге база республиканың чурттакчыларынга, оларны кезээде эки кижилер долганып чоруурун күзээр-дир мен. Бөгүнгү хүн өөрүшкүлүг болгаш чедиишкиннерлиг болзун, а даартагы хүн – идегелдиг болгаш чырык болзун».
Тываның адыр аайы-биле профэвилелдериниң төлээлери республиканың медицина болгаш социал ажылдакчыларының күш-ажыл төлевири, республиканың уругларның кадыкшылга лагерьлериниң путевка өртээн эде көөрү, муниципалдыг албан черлериниң ажылдакчыларының санаторий, курортарга эмнедириниң 2 чылда 1 катап орук өртээниң төлевирин 2024 чылдың республика бюджединче киирери дээш өске-даа айтырыгларны саналдаан.
«Профэвилелдер федерациязының бөгүн киирген шупту санал-оналдарын республиканың чазаа көргеш, күш-ажылчы кижилерниң чаагай чоруу дээш хоойлу-дүрүм актыларынче өскерилгелерни киирерин кызыдар бис» - деп, ужуражылганы түңнеп тура Орлан Сарыглар чугаалаан.
А.СОЯН.
Буян ООРЖАКТЫҢ тырттырган чуруктары.
