Тываның Баштыңы Владислав Ховалыг Красноярскының каайлы албанының оралакчызы Анатолий Петрунин-биле ужурашкан. Россия биле Моолдуң кызыгаарында “Хандагайты – Боршоо” автомобиль эрттирилге пунктузун хөй талалыг кылдыр чаартырының айтырыгларын олар сайгарып көргеннер. Хөй талалыг эрттирилге пунктузунуң ажылдакчыларынга чуртталга бажыңнарын тударының дугайында база Владислав Ховалыг биле Анатолий Петрунин чугаалажып, аңаа инвесторларны хаара тударының ажыктыын демдеглээннер.
Каайлы албанының ажыл-чорудулгазы Тываның экономиктиг сайзыралынга болгаш даштыкы чурттар-биле харылзааларны алгыдарынга көскү салдарлыг. Тыва-биле садыг база экономиктиг харылзааларны тудуп турар чурттарның аразында Моол, Кыдат болгаш Беларусь бар деп, Тываның Баштыңы айыткан. Барааннарның декларациязын долдурары – нарын айтырыг. Ону каайлы ажылдакчылары кылыры чаңчыл апарган. Бо ажылга коммерциялыг организацияларны хаара тудуп, республиканың сайгарлыкчыларынга дузалап, бизнести чедиишкинниг чорударынга деткимчени көргүзери чугула. Республикадан үндүр, даштыкыдан киир саткан барааннарны түр када шыгжаар складтарның Тывада чогу даштыкы чурттар-биле садыг-экономиктиг харылзааларга шаптыктыг. Бо айтырыгларже кичээнгейни Владислав Ховалыг угландырып, оларны дарый шиитпирлээри чугула деп санап турар.
Россияның кыдыг-кызыгаары девискээрде Тыва Республикага каайлы албанының ужур-дузазы улуг. Октябрь 25-те демдеглеп эрттирген Каайлы ажылдакчызының хүнү-биле бо албан чериниң удуртулгазынга болгаш ажылдакчыларынга Тываның Баштыңы Владислав Ховалыг байыр чедиргеш, күрүнениң айыыл чогун, эрге-ажыктарын камгалаарынга каайлы албанының ажылдакчыларының улуг үлүүн демдеглээн.
Ш. МОНГУШ белеткээн.
“Шын” №82 2023 чылдың октябрь 28