Чесноктуг соустуг кабачок:
Кабачокту шору улуг кылдыр шѳйбейтир кескилээш, буска хайындырып аар. Чесноктуң 3–4 хире кезээн мыйыргын кылдыр доорааш азы тускай херексел-биле чуура кыстыргаш, хээндектээн базилик-биле катай бичии савага ургаш, кырындан шымчым хире дусту, хоюг кара перецти бызааш, 1 шопулак ишти лимон чулуу-биле холуй булгаптар. Чесноктуг ногаан соус болганы ол. Буска бышкан кабачоктуң кырынче ол соусту салыр.
Тырткан эът, быштактыг кабачок:
Кабачокту ортузун хозай кескилээш, иштинче тырткан эътти суккаш,ооң кырындан пармезан чижектиг үүрмектеп каан быштакты салгаш, 160 градус духовкаже суккаш, 1 шак хире быжырар.
Үске хаарган тѳгерик кабачок:
Дыка улгатпаан аныяк кабачокту чуггаш, карты-биле катай тѳгериктей кескилээш, дус холуп каан кургаг далганга 2 талазындан борааш, изиг үске 20–25 минута иштинде быжырар.
Интернет четкизинден алган.
«Шын» №72 2024 чылдың сентябрь 21