“Школаже белеткениринге дузалаш” деп чылдың-на болуп эртип турар ачы-дуза акциязы бо чылын база республикада эгелей берген. Ук деткимчени амыдыралы берге байдалда, эвээш өнчү-хөреңгилиг, хөй ажы-төлдүг, долу эвес, кадыы кызыгаарлыг ажы-төл азырап турар өг-бүлелер ап турар.
Август 1-ниң хүнүнде “Чаңгыс демниг Россия” партиязының идепкейжилери акцияны ажыткан. Демир-үжүк, карандаштар, кыдырааштар болгаш өске-даа өөрениринге эргежок чугула херекселдер-биле чүмнээн школачы рюкзактарны садып белеткээш, дуза херек уругларга сөңнээн. Бистиң республикада күш-ажылчы коллективтер, хууда сайгарлыкчылар болгаш сагыш човангыр кижилер бо акцияның ачызында хөй ажы-төлдүг, эвээш орулгалыг, амыдыралы берге байдалга таварышкан өг-бүлелерни 16 дугаар чыл деткип келген.
ТР-ниң Дээди Хуралының (парламент) Даргазы Каң-оол Давааның чугаалап турары-биле алырга, Россияның Президентизи амгы үеде чаа өөредилге чылының эгезинге белеткелче онза кичээнгейни угландырып турар. “Ынчангаш бис бо акцияга үргүлчү киржип турар бис. Сентябрь 1-де бистиң уругларывыс школага белен болуп, өөрүшкү-биле ынаар барзын дээш, кызып турар бис” – деп, Каң-оол Даваа чугаалаан.
Республикада хөй ажы-төлдүг өг-бүлелер хөй дээрзин Белекмаа Мунге демдеглээн: “Уруг бүрүзүн школага белеткээри – улуг харыысалга. Тыва чон шаандан тура-ла өөр-өнер, дуза хереглээн улуска аажок дузалажып чораан. Ол чаңчыл амдыгаа чедир кадагалаттынып артканы өөрүнчүг-дүр. Шак мындыг дуза өг-бүлениң бюджедин бичии-даа болза камнап берип турар. Чамдык өөредилге херекселдери үрели-даа бээр, чиде-даа бээр. Ынчангаш артыкшылдыг чыдар болза эки”.
Буянныг үүлеге киржир чолдуг болганынга Ыяап-ла медицина камгаладылгазының фондузунуң даргазы Шолбан Күжүгет өөрүшкүзүн илереткен. “Бирги классче кирер ажы-төлге дузалавас болза, кымга дузалаар. Ажы-төлдүң эки өөрениринге ол канчаар-даа аажок улуг идиг болур. Чаштар дээрге бистиң келир үевис-тир. Олар-ла эки өөренип алыр болза, күрүнениң-даа, чурттуң-даа байдалы оон хамааржыр. Ынчангаш бо акцияны келир үеже киирип турар эки үүлевис деп санаар-дыр мен. Ажы-төлге бо деткимчени берип тургаш, буян-кежикти, эки өөредилгени, ада-иезин дыңнаарын күзээр-дир мен” – деп, ол йөрээлин салган.
Ол ышкаш Республиканың консультация-диагностиктиг төвүнүң улуг эмчизи Долаан Калбак, ТГШИ-ниң директору Вячеслав Март-оол база өскелер-даа дузазын кадып келгеннер. Эрткен чылын школага белеткениринге 4 муң ажыг уругга дузалашканын олар демдеглээннер.
Кызыл кожууннуң Целинное суурдан келген Урана Намчыл партияның идепкейжилеринге дуза катканы дээш өөрүп четтиргенин илереткен: “Өөредилге чылынга белеткенири дээрге улуг ажыл болгаш чарыгдал. Дуза хереглээн улуска өөренир херекселдер болгаш рюкзактар-биле дузалажып турары, канчаар-даа аажок өөрүнчүг-дүр. Акцияның киржикчилеринге улуу-биле өөрүп четтирдим”.
“Школага белеткениринге дузалаш” деп акция “Чаңгыс демниг Россия” партиязының чаа өөредилге чылының эгезинде эрттирер чаңчылы апарган. Сагыш човангыр кижилерниң деткимчези дуза хереглээн өг-бүлелерниң ажы-төлүнге 2024 чылдың сентябрь 1-де өөредилгеже белен шымнып кириптеринге дуза болур.
Чыжыргана СААЯ.
Самба Норбужуктуң тырттырган чуруктары.
"Шын" №58 2024 чылдың август 3
