Тыва Республикада Иштики херектер яамызы бо чылдың 8 айының түңнелдери-биле таныштырган. Яамының үндүрген түңнелдери езугаар алырга, республикада кем-херектер үүлгедир чорук ниитизи-биле чавырлып турар байдал бар болуп турар.
Республика девискээринде бүрүткеттинген кем-херек үүлгедиишкиннериниң сан-чурагайлары кызырылган дээрзин иштики херектер сайыды Ю. Поляков дыңнаткан. Эрткен 2021 чылдың сес айының статистиктиг сан-медээзинге деңней алырга, кем-херек үүлгедиишкиннериниң саны дөртүң бир кезии хире кызырылган болуп турар. Кадыкшылга аар хора чедирген кем-херек үүлгедиишкиннерин истеп ажыдар чоруктуң деңнели чүс хуу четкени ук албан чериниң ажылының үре-түңнелдиг болуп турарын херечилеп турар. Ындыг кем-херек үүлгедиишкиннериниң ниити саны 24 хуу кызырылган.
Үптээшкиннерниң саны база эвээжээн дээрзин эрге-хоойлу камгалаар албан чери дыңнадып турар. Сес айның дургузунда оларның саны 40 ажыг хуу кызырылган. Дээрбедекчи чорук – 43 хуу чавызаан. Мал-маган оорлаар чоруктар база көзүлдүр-ле эвээжээн. Оон аңгыда, оорга алыскан соталыг телефоннарны дилеп тывар чоруктуң үре-түңнелдии 41 хуу өскен.