Уруглар ойнаар шөлчүгеш немешкен
Өвүр кожууннуң төвүнде уруглар ойнаар шөлчүгеште ажылдар доозулган. Эрткен чылын өвүржүлер «Таарымчалыг хоорай хүрээлеңин хевирлээри» федералдыг төлевилелге киржип, Хандагайты суурнуң чаштарынга ойнаар шөлчүгеш дээш үнүн берип, бир дем-биле ажылдаан.
Алтайдан алдын, мөңгүн медальдар
Мөңгүн-Тайга кожууннуң «Меңгилиг», Бай-Тайга кожууннуң «Шуй» волейбол командалары республикада шыырак ойнакчылар кылдыр санадып турар. Эрткен неделяда Алтай Республиканың Усть-Кан суурга «Алтай-Инвест» кубогу дээш регионнар аразының маргылдаазы болуп эрткен. Аңаа Алтайдан, Тывадан, Хакасиядан, Саха (Якутиядан), Алтай крайдан ниитизи-биле 56 команда киришкен. Аныяктар аразынга дүшкүүрлүг оюннарның түңнелинде «Меңгилиг» командазы бүзүрелдии-биле тиилээн, а «Шуй» ачыр-дачыр тутчуп тургаш, ийиги черге төлептиг болган. Тывада хол бөмбүүнүң сайзыралы бедик деңнелде деп чүүл бадыткаттынган.
Айыыл чок дыштанылгалар
Эрткен неделяда Хову-Аксы суурнуң модельдиг библиотеказынга Тываның төп болгаш мурнуу кожууннарының аразынга «Айыыл чок дыштанылгалар» деп «төгерик ширээ» болуп эрткен. Чеди-Хөл кожуун чагыргазы биле тус черниң Адалар чөвүлелиниң эрттирген хемчээнге Тываның Адалар чөвүлелиниң баштаар чериниң даргазы Сайдаш Монгуш база киришкен. Аңаа «Эр сорук» төлевилелин сайгарып, назы четпээн уругларның чайгы дыштанылгаларын ажыктыг болгаш айыыл чок кылдыр эрттирерин, хөй-ниити шимчээшкиннериниң бо ажылга киржилгезин чугаалашкан.
Каа-Хемде гуманитарлыг дуза чыылдазы
Тускай шериг операциязынче чорудуп турар гуманитарлыг дузаның ээлчеглиг чайгы чыылдазы Каа-Хем кожуунда кидин түлүк. Бо хүннерде кожууннуң Өөредилге болгаш Культура эргелелдери бензин-биле ажылдаар генераторларны садып белеткээн. Бүрен-Бай-Хаак суурда «Милосердие» волонтёрлар пунктузу камгалал четкилерни аргаан. Сарыг-Сеп суурнуң депутады А. Хабаров болгаш С. Елькина, А. Молдавский, А. Масловтуң өг-бүлелери, Суг-Бажындан А. Бичекейниң өг-бүлези акша дузаламчызын көргүскен. Тиилелгени чоокшуладыр сорулга-биле гуманитарлыг дуза чыылдазын каа-хемчилер ам-даа уламчылаар.
Чаа культура одааның тудуу
Улуг-Хем кожууннуң Арыг-Үзүү суурда «Сорунза» губернатор төлевилелиниң ачызында чаа Культура бажыңы туттунуп турар. Ном саңы-биле кады турар 120 олуттуг культура одаан республика болгаш тус чер бюджединиң акшаландырыышкыны-биле кылып турар. Тудуг ажылдарында тус черниң специалистери хаара туттунган.
Үстүү-Хүрээде септелге ажылдары
Делегей чергелиг IV буддийжи шуулганга уткуштур Чөөн-Хемчик кожууннуң сумулары болгаш албан-организациялары Үстүү-Хүрээниң девискээрин арыглап-аштап, чаагайжыдып, септелге ажылдарын эгелей берген.
/ Н. КУУЛАР белеткээн.
Медээлерни болгаш чуруктарны кожууннарның социал четкиде
арыннарындан алган.
“Шын” №28 2026 чылдың июль 23
"Шын" солуннуң МАХ-каналынга каттыжыңар: max.ru/channel_shyn