Республика спартакиадазында чедиишкинниг киржип турар командаларның бирээзинге Кызыл кожууннуң херээженнер командазы хамааржыр. Олар бөгүн 18 хардан 39 хар чедир назылыг командалар аразынга хол бөмбүүнүң түңнел оюнунга киришкеш, үшкү черге төлептиг болганнар.
Команданың кежигүнү Долгармаа Оножеева: «Кызыл кожууннуң аңгы-аңгы сумуларындан, ол дээрге Целинная, Шамбалыг, Сукпак, Ээрбектен чыылган уруглар командазы-дыр бис. Бөгүн чүгле түңнел оюннар артып калган. Бис бөгүн үшкү чер дээш ойнааш, Улуг-Хем кожууннуң командазын тиилеп алдывыс. Командавыста 11 кижи бар, капитанывыс — Целинная командазының төлээзи Валентина Маңган-ооловна Салчак.
Республикага болуп турган хол бөмбүү маргылдааларынга үргүлчү киржип турган ойнакчылар-дыр бис. Республика спартакиадазынга кожуунувусту төлээлеп киржири биске чоргаарал-дыр. Мындыг улуг спортчу маргылдааны организастап эрттирип турары эки-дир. Бир эвес бистиң кожууннуң чыынды командазы тиилеп алыр болза, кожуунувустуң бир суурунга спорт залы туттунар. Ол дээрге дыка улуг чедиишкин-дир. Ынчангаш тиилелге дээш шупту спортчу хевирниң ойнакчылары демниг ойнап, удуп алыр дээш кызып турар бис» — деп чугаалаан.
Бистиң корр.
Шеңне Хертектиң тырттырган чуруктары.
