| Одалга сезону |
Күс дүжүп, кыш чоокшулаарга печка одаар бажыңнарда чурттакчыларга хөмүр айтырыы кончуг чугула апаар. Хөмүрнү кайыын, канчаар садып алырының дугайында кожуун чагыргалары социал четкилерде арыннарында удаа-дараа чырыдып турары чурттакчы чонга эптиг. Ноябрь 9-туң медээлери-биле алырга, Чаа-Хөл кожууннуң Чаа-Хөл суурда Ленин кудумчузунуң бир дугаар бажыңында одалга склады ажылдап турар. Ол понедельниктен пятница хүннеринде эртенгиниң 9.00 шактан 17.00 шакка чедир ажылдаар. Кожууннуң курлавырында ниитизи-биле 9 тонна хөмүр бар. Бир тоннада өртээ 1950 рубль. Чедирилге дээш Чаа-Хөл суурда – 500, Кызыл-Дагже – 1500, Ак-Туругже 3000 рубль немей төлевирлиг.
Таңды кожууннуң Бай-Хаак суурда Шоссейная кудумчузунда 1А дугаар оран-савада хөмүр складында ниитизи-биле 33,02 тонна хөмүр бар. 2026 чылдың январь 1-ден тура тоннада 4413 рубль. Хөмүр чедиргени дээш, Бай-Хаак суурже – 850, Дүргенче – 960, Сосновка- же – 1040, Межегейже – 1840, Успенкаже – 2070, Кочетов- че – 3770 рубльди төлээр апаар. Хөмүрнүң кайы хире барын айтырып алырда, дараазында телефон дугаарынче долгап болур:
+7 923 260‑11‑63.
Бии-Хем кожуунда Шоссейная кудумчузунда 2 “б” дугаарлыг оран-савада ажылдап турар хөмүр складында 1 тоннада хөмүрнү 4483 рубльде садып турар. Ол ышкаш Улуг-Хем кожууннуң Шагаан-Арыг хоорайда “Шагонар” тудуг эргелелинде ноябрь 6-ның медээзи-биле 81,574 тонна, а “Демниг” КХН-де 60,40 тонна бар. Ниитизи-биле кожуунда хөмүр курлавыры чурттакчы чонга чедер. Айтырыглар бар болза, 8-993-393-08-85 телефон дугаары-биле харылзажып болур.
Сүт-Хөл кожууннуң төвү Суг-Аксы суурнуң бажында “Логистика” КХН хөмүр складының ажылын эгелеп, хөмүрнү 1 тоннада 3819 рубльга садып эгелээнин ооң удуртукчузу Алдар-оол Ооржак дыңнаткан.
Кандыг-даа одалга складындан хөмүр садып алырда, бир дугаарында Хөй хүлээлгелиг төпке (МФЦ) паспорт, СНИЛС база телефон дугаары, Күрүне ачы-дуза порталы кирер телефоннуг баргаш, QR-кодту кылдырып алыр. Ук албан чериниң ажылдакчылары бо ажылды кылырынга дузалажып турарлар. Азы “Угольная продукция” күрүнениң информастыг системазы порталче дараазында айтыгже киргеш, бүрүткедип алыр: cpgu.rtyva.ru. Ооң соонда QR‑кодту хууда кабинеттен ап алгаш, QR‑код биле паспорттуг хөмүр складынга чеде бээр. Бир эвес бүрүткел талазы-биле арга-сүме херек апарза, Хөй хүлээлгелиг төптен дуза дилеп болур.
Оон аңгыда республикада күрүне деткимчези “Социал хөмүр” төлевилели база уламчылап турар. Ынчалза-даа ында өскерилгелер киргенин дыңнадыры чугула. 2026 чылдың июль 22-ден тура Тыва Республиканың Чазааның 322 дугаар доктаалының үнгени-биле тускай шериг операциязының чамдык киржикчилеринге болгаш оларның өг-бүлелериниң кежигүннеринге, 4 азы оон хөй ажы-төлдүг эвээш орулгалыг өг-бүлелерге ук программа-биле хөмүр бээр чурум өскерилген. Бо чылдан тура хөмүрнүң бодун эвес, а ооң өртээн акша-хөреңги-биле берип турар апарган.
Ниитизи-биле кожууннарның хөмүр складтарының курлавыры четчир.
Ч. СААЯ.
Чурукту Сүт-Хөл кожууннуң чагыргазындан алган.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn