Сентябрь 9-та "Найысылал" арт-төпке хоорайның сайзыралынга үлүг-хуузун киирген шылгараңгай чурттакчыларынга Кызыл хоорайның Төлээлекчилер хуралының мурнундан муниципалдыг дээди шаңналдарны тывыскан.
“2022 чылдың Күш-ажылдың шалыпчызы” шаңналды хоорайның аңгы-аңгы адырларында эки ажылдап чоруур 15 хамааты - чолаачылар, башкылар, эмчилер, инженер, электромеханик, аштакчы болгаш өскелер-даа алган. “Кызыл хоорайның сайзыралынга киирген үлүг-хуузу дээш” медаль-биле Кызылдың дугаары 12 школазының химия башкызы Саглай Монгуш шаңнаткан.
“Кызыл хоорайның алдарлыг ажылдакчызы” бедик атка тыва радионуң хоочуну, Россияның Журналистер эвилелиниң кежигүнү Светлана Данзын-оол төлептиг болган.
Ол-ла шаңналдар тывыскан байырлыг хуралга Кызылдың ыдык ырын чогааткан авторлар - Тываның улустуң чогаалчызы Эдуард Мижит биле Тыва Республиканың культураның алдарлыг ажылдакчызы, композитор Сергей Бадыраага авторнуң шынзылгаларын тывыскан.
