Кызыл хоорайның төвүнде Арат шөлү, Кочетов, Ленин кудумчулар май бирниң хүнүнде кызыл, көк дээш оон-даа өске өңнер-биле айыраң чараш кылдыр каастаныпкан. Май бирде чылдың-на эртер чаңчыл болган байырлыг чыскаалды сонуургап көөр дээн кижилер аңаа хөйү-биле чыглып келгеннер.
Ленин кудумчузунга күш-ажылчы коллективтерниң болгаш албан черлериниң, политиктиг организацияларның кежигүннериниң, өөредилге черлериниң студентилериниң болгаш сургуулдарының чыскаалдары тургустунуп, Арат шөлүнче шуужуп чоруп турганнар. Чыскаалда кижилер Россияның болгаш Тываның туктарын кырынга киискидип, чүзүн-баазын өңнерлиг шарларны тудуп алгаш чорааннар.
Россияның болгаш Тываның социал-экономиктиг чедиишкиннериниң дугайында тайылбыр, “Россияны күштүг болдураалыңар!”, “Күштүг Россия, бурунгаар!”, “Россия биле Тыва кезээде кады!” дээш өске-даа кыйгырыглар агаарга чаңгыланып турган.
Май 1-де Кызыл хоорайга эрткен байырлыг чыскаал республиканың чоннарының демнииниң, күш-ажылчы болгаш патриотчу тура-соруу күштүг дээрзиниң демдээ болган.
Бистиң корр.
