Республикада мал оолдаашкыны адакталып турар. 2025 чылдың январь 1-ниң көргүзүү-биле республиканың бүгү көдээ ажыл-агыйларында 429,6 муң төрүүр шээр мал бар (323,8 муң хой болгаш 105,8 муң өшкү), ол ышкаш 77,2 муң баш инек база 43,8 муң баш бе.
2025 чылдың май 16-ның көргүзүү-биле республиканың көдээ ажыл-агыйларында 322,3 муң баш хураган болгаш анайлар төрүттүнген (планның 107 хуузу), бызаалар — 50,0 муң баш (азы 81,0 хуу), кулуннар — 24,2 муң баш (азы 79,1 хуу).
Шээр мал оолдаашкынының планын 8 кожуун ажыр күүсеткен:
Таңды кожуун — 146 хуу азы 10,4 муң баш хураган;
Бии-Хем — 131 хуу азы 12,1 муң баш;
Чаа-Хөл — 131 хуу азы 9,0 муң баш;
Кызыл — 118 хуу азы 37,4 баш;
Сүт-Хөл — 117 хуу азы 27,9 муң баш;
Чөөн-Хемчик — 116 хуу азы 26,1 баш;
Мөңгүн-Тайга — 114 хуу азы 20,3 муң баш;
Өвүр — 108 хуу азы 20,8 муң баш.
Бода малдың төлүн үш кожуун эң-не хөй алган: Сүт-Хөл (109 хуу, азы 4,2 муң баш бызаа), Тере-Хөл (100 хуу азы 1,1 муң баш), Эрзин (98 хуу, 3,9 муң баш).
Кулуннар Сүт-Хөл кожуунда (109,9 хуу азы 1,6 муң баш), Чөөн-Хемчикте (104,7 хуу азы 2,1 муң баш), Кызыл кожуунда (102 хуу азы 4,0 муң баш) эң-не хөй төрүттүнген.
Республиканың девискээринде онза айыылдыг мал аарыглары илеретинмээн, халдавырлыг аарыглардан мал аараан таварылгалар бүрүткеттинмээн (май 16-ның көргүзүү-биле). Ветеринар-профилактиктиг хемчеглерни, ооң иштинде ящур болгаш сибирь язвазынга удур хемчеглерни план езугаар чорудуп турар.
Республиканың ветеринария төвүнүң салбырларында бо хүнде 7100,00 муң рубль түңнүг эмнер курлавыры бар.
Бистиң корр.
Чуруктарны интернеттен четкизинден хоолгалаан.
“Шын” №19 2025 чылдың май 22
