2023 чылда “Кадык камгалалы” национал төлевилелдиң боттанылгазының түңнелинде Чөөн-Хемчиктиң кожууннар аразының медицина төвүнге 39 чаа медицина дериг-херексели келген.
Хирургия салбырынга резекция болгаш коагуляция кылыр электри-биле дүрген ажылдаар аппаратты ажылдаткан. Ооң ажыглалы кезиишкинниң үезин болгаш дамырларның ханзыраарын эвээжедир. Ол-ла салбырга чыдар аарыг улусту кажан тускай дериттинген кабинетче чедирери болдунмас таварылгада “Парус” деп шимчеп чоруур рентген аппарадын ажыглалче киирген. Кезиишкин кылырда, билинместедип алыр чаа аппараттар кезиишкин блогунуң дериг-херекселинге кончуг ажыктыг немелде херексел болур. Ол ышкаш пациентилерниң өкпезинче үр үе дургузунда агаар кииреринге хереглээр амгы үениң сенсорлуг экранныг болгаш генераторлуг херексел база келген.
“Кадык камгалалы” национал төлевилелдиң ачызында эмнелгени анализтерниң харыыларын дүргедедир херекселдер-биле база чүмнээн. Функционалдыг диагностика кабинединде “Компакт-нейро”, чүректиң шын соп турарын хынаар холтер аппарады база келген. Уругларның соматика салбырынга дүрген эмчи дузазының ышкаш чаштарга реанимация наборун база берген.
Электри-биле ажылдаар бактериялар эрттирбейн сордурар херексел эмнелге ажылдакчыларынга балыглар азы ооң иштинден хан, шараланчак, дестиг, ириңниг болгаш оон-даа өске бүдүмелдерни шынарлыы-биле аштап-арыглаарынга кончуг дузалыг. Ол ышкаш ханда глюкозаның хемчээлин хынаар херексел, кислородтуг ингалятор, эмнерниң хемчээлин хынаар шприц хевирлиг насос база келген. Дефибриллятор деп медицина херекселдери арыглаар тускай херексел база эмнелгениң ажылынга кончуг дузалыг болган.
Чөөн-Хемчик кожууннуң Баян-Тала суурда кадык камгалалының бирги звенозун чаартыр программа-биле чаа фельдшер-акушер пунктузу база ажыттынган. Ук оран-саваны хырбалаан дөрт кырлыг ыяштар-биле туткаш, эргежок чугула медицина дериг-херексели, иштинге турар херексел, дүрген ажылдаар интернет, компьютерлер-биле дерээн.
2023 чылда Чөөн-Хемчиктиң кожууннар аразының медицина төвү “Кадык камгалалы” национал төлевилелдиң “Кадык камгалалының бирги звенозунуң чаартылгазы” деп федералдыг программазының боттанылгазы-биле 3 автомобильди база алган.
Ч. СААЯ.
Чуруктарны интернеттен алган.
“Шын” №19 2024 чылдың март 13
