Бистиң амыдыралывыста эмчилерниң ажык-дузазы, чедирген буяны канчаар-даа аажок эң чугула чүүл-дүр. Чеже-даа ажылы берге болза, олар ажылын черле кагбас, ажылдап-ла турарлар. Ылаңгыя коронавирус үезинде чоок кижилерин, ажы-төлүн дыка үр көрбейн, сактып, сагыш човап турганнар болгай. Эмчи кижиниң хүлээлгези чүгле мага-ботту эмнээри эвес, а аарыг кижиниң сагыш-сеткилинге идегелди оттурар ужурлуг. Аарыг кижи муңгаранчыг бодалдарындан чоорту адырлып, арта чиик, сергек апаар, чурттаар күзели-даа оттур, бүзүрели, идегели күштелип кээр.
Бии-Хем кожууннуң төп эмнелгезинде ниити аарыглар эмчизи Виктор Михайлович Санчай эртениң-не чыдар палатавыска чедип кээр, мендилежир. Ол аарыг кижи бүрүзүн баргаш хынаар, шуптувусту эргий шинчиир, айтырар, кандыг эм кижиниң мага-бодунга канчаар дээп турарын, аптекада чаа эмнер барын база тайылбырлаар, сүмелээр. Кандыг эмнер ижерин, кажан, канчаар ажыглаарын биске дыка таптыг чугаалап бээр. Эмнелгеге суурлардан, малчын аалдардан, Туран хоорайдан аарыг кижилер чыдып эмнедир. Аарыг улус дээш уйгу-дыш чок, могаг-шылаг билбес буянныг эмчи болду. Ол чонунга буян-кежиин сөңнеп, бисти, аарыг кижилерни, эки эмнеп, эъди-кеживисте аарыг черлерни тудуп суйбап, оожум соктап, хынап-ла турар кижи.
Амгы үеде аныяк эмчилер анаа-ла кайда аарып турарын айтырып турар, сактырга, сени тудуп суйбаарындан эпчоксунуп, ческинип турар-даа ышкаш апаар. Эң ылаңгыя мен ышкаш, 60-70-80 хар ашкан хоочуннарга шуут дегбес. Аараан кижиниң мурнунга туруп алгаш, анаа-ла байысаап, айтырыгларын салып каап турар боор чорду. Виктор Михайлович ындыг эвес, ажылынга бердинген, бодунуң күжүн, энергиязын харам чокка чоннуң кадыы дээш хөй чылдарда өргүп келген.
Аарыг улуска, эң ылаңгыя бичии чаштарга, шак мындыг эмчилер, эргим ынак авазы ышкаш сагындырар, кижилерниң кадыын камгалап, аарыг-човулаңдан эмнеп, чонунга буянныг ачы-дузазын чедирип чоруур хүндүткелдиг кижилерниң бирээзи-дир.
Светлана ЛАПЧАА.
Бии-Хем, Өөк суур.
“Шын” №27 2025 чылдың июль 17