Ноябрь 13-тен 22-ге чедир Тывага “Россияның уруглары – 2023” деп ведомстволар аразының оперативтиг профилактика операциязын чоруткан. Ооң кол сорулгазы – назы четпээннер болгаш аныяктар аразынга наркоманияны таратпазын баш бурунгаар суртаалдаары, наркотиктер ажыглап, ону садып-саарар кем-керек үүлгедиишкиннеринде киржип турарларны илередири, ындыг улуска хоойлу мурнунга кандыг кеземче херээнге онаажып болурунуң дугайында тайылбыр ажылын чорудары.
10 хонук дургузунда полиция ажылдакчылары хүннүң-не аныяктар чыглыр черлерге рейдилерни чоруткан. Ындыг рейдилер үезинде Кызылдың девискээринде 50 хөй-ниитиниң объектилерин, 6 ниити чуртталга бажыңнарында чурттап турар студентилер-биле ажык чугааны чорудуп, тайылбыр ажылын кылган.
Ол-ла хыналдалыг рейд үезинде назы четпээннерниң болгаш 18–35 харлыг учетта турар улустуң чурттап турар адрезинге чедип, ада-иелери, боттары-биле база ажык чугааны кылган. Ниитизи-биле республикада 500 ажыг кижи учетта турар. Оларның-биле арага ижери болгаш наркотик тарадыры, ону ажыглаарының хоразының дугайында катап-катап тайылбыр ажылын күштелдирген. Бир удаа ол талазы-биле херекке онаажып турганнарны катап база багай салдарлыг чаңчылдан чайладыры-биле эвээш эвес профилактика ажылдарын чоруткан.
ТР-ниң ИХЯ-ның Хөй-ниити чөвүлелиниң кежигүннери, шажын-чүдүлгениң төлээлери, РФ-тиң Тыва Республикада кеземче күүселдезиниң федералдыг албанының Кеземче-күүсекчи инспекцияның ажылдакчылары кеземче херээнде онаашкан 14 хар четкижеге чедир хоругдалче кирбээн эдип-чазаар ажылдар кылыры-биле, шииттиргеннерниң боттары-биле болгаш оларның төлээлери-биле ужуражылгаларны организастаан.
ТР-ниң ИХЯ-ның Чурум үрээн назы четпээннерни түр када тудар төвүнче кирген элээдилерге катап база частырыг кылып, шак ындыг кем-херек үүлгедиишкинин катаптавазынче угланган ажылды күштелдирген.
Республика девискээринге чоруткан операция үезинде хоойлуга удур наркотиктер садып-саарар 24 барымдааны илереткен. Түңнелинде, 21 кеземче херээн оттурган, 8,9 килограмм наркотиктерни хавырган.
Ол-ла рейд үезинде республиканың школалары болгаш ортумак өөредилге черлеринге “Кадык шилилге дугайында” деп киберкичээлди ТР-де ИХЯ-ның наркохыналда эргелелиниң ажылдакчылары эрттирген. Ол кичээлдерге наркотиктиг бүдүмелдер ажыглаарының хоразы, ону садып-сааргаш, кеземче херээнге онаажып, аныяк чалыы назынын үреп турарының дугайында социал угланыышкынныг роликтерни көргүскен. Шак ындыг көргүзүг кичээлдер уругларга дээштиг болуп турар. Аңаа ниитизи-биле 23 муң ажыг сургуулдар киришкен.
Оон аңгыда, Таңдының уругларның хөй-ниити организацияларының аразынга квест-оюнну эрттирген. Аңаа сургуулдар эрге-хоойлу талазы-биле билиин быжыглап, Конституция ёзугаар боттарының эргелерин болгаш хүлээлгелерин база катап шиңгээдип алганнар.
Кадык-чаагай амыдыралды суртаалдаары-биле, ТР-де ИХЯ-ның наркохыналда эргелели Кызылдың дугаары 11 школаның 9-ку классчыларының аразынга акцияны организастаан.
Ниитизи-биле өзүп олурар салгал багай салдарлыг чаңчылдарга алыспайн, кадык-чаагай амыдыралче чүткүлдүг болзун дээш, республика девискээринге 2 муң ажыг кижини хаара туткан 49 хемчегни эрттирген.
ТР-де ИХЯ-ның Наркохыналда эргелелиниң медээзинден К. МОНГУШ белеткээн.
“Шын” №91 2023 чылдың ноябрь 29
