Тываның кадык камгалал адырының хоочуну, хөйге билдингир нейрохирург эмчи Валерий Шиирипей “Салым-чолдуң белдирлеринге. Тыва нейрохирургтуң очерктери” деп аттыг номну чырыкче парлап үндүрген.
Номнуң автору бүгү назынында ажылдап келгени республиканың нейрохирургия албанының тургустунганындан эгелээш, бо хүнге чедир сайзыралының дугайында бижип турар. Валерий Николаевич номну бодунуң 70 харлаан юбилейин уткуштур үндүргеш, кады ажылдап чораан эш-өөрүнге ынчалдыр белекти сөңнээн.
“Салым-чолдуң белдирлеринге. Тыва нейрохирургтуң очерктери” – нейрохирургия албанынга хамаарышкан төөгүлүг болуушкуннар-биле байлак ном. Ол ышкаш албанның эмчилериниң болгаш пациентилериниң амыдырал-чуртталгазындан онза болуушкуннарны тодаргай киирген. Номнуң автору улуг кичээнгейни кады ажылдап турган коллегаларынче угландырып, кандыг-даа хөөредиишкин чокка оларның долу ат-сывын айытпышаан, допчу намдарларын номда тода бижээн. Валерий Николаевичиниң номда киирген сактыышкыннарындан ыраккы совет үениң атмосферазын, эде тургузуушкун чылдарының буураашкынының болгаш кадык камгалалының сөөлгү чылдарда шапкын сайзыралының дугайында билип ап болур.
Номнуң автору, хөйге бидингир эмчиниң байлак дуржулгазы медицина эртемнериниң кандидадының диссертациязын кылып тургаш, бодунуң амыдыралынга болгулаан онзагай болуушкуннар, эскериглерин таварыштыр эртип турар. Ол ышкаш Эртем-шинчилел институдунга кадык камгалал адырының нарын айтырыглары болгаш башкарыкчы шиитпирлерни ажылдап кылырының талазы-биле шинчилел ажылдарын чорудуп келген.
“Чуртталга – чүгле ажыл эвес” деп кезекте Валерий Николаевич ажылындан аңгыда, бодунуң хууда амыдыралынга хамаарышкан сонуургалдары, аян-чоруктары, тудуг, балыктаашкын дээш өске-даа чүүлдер дугайында бижип турары сонуурганчыг. Оон аңгыда, номда республиканың кадык камгалал адырының болгаш нейрохирургия албанының төөгүзүнге улуг ужур-уткалыг ховар фото-чуруктар кирген.
“Ол ышкаш бодумнуң өг-бүлем дугайында база чугаалаксаан мен. Эгин кожа чурттап чоруур эжим база невролог эмчи, бичии уруум база терапевт эмчи болган. Ол бисти дөзеп, өөренип чораанывыс Томскунуң күрүнениң эмчи институдун дооскан. Ниитизи-биле бистиң ызыгуур салгаан өг-бүлениң эмчи стажы 112 чыл” – деп, Валерий Николаевич номунда бижип турар.
Номнуң автору дараазында Тывага нейрохирургия албанының төөгүзүнүң дугайында ийи дугаар номун парлаарынче белеткеп турарын дыңнаткан.
ТР-ниң Кадык камгалал яамызының медээлери-биле.