Тываның кааңдаачал агаар-бойдузунуң байдалынга картофель болгаш ногаа аймаа тарып өстүрери дыка берге ажыл. Кончуг кааңдаашкын болган чайын ногаажылар ажаап алыр дүжүт чок артып каап болур. Республиканың ындыг агаар-бойдузунга Александр Желтухин картофель болгаш ногаа тарып өстүрерин чедиишкинниг чорудуп келген фермер. Ооң ажылының чедиишкиннериниң кол чылдагааны бодунуң шөлдеринге суггат дериг-херекселин тургузуп, чедиишкинниг ажыглап келгени.
Бодунуң ногаажы ажыл-агыйының материал-техниктиг баазазын доктаамал быжыглап келген. Республиканың болгаш көдээ ажыл-агый яамызының удуртулгазының деткимчези-биле ногаа шыгжаар болгаш болбаазырадыр комплекстиң тудуун Сукпак суурга Александр Желтухин 2022 чылда тудуп эгелээн. Келир күзүн, бо чайын тарып өстүрген ногаа дүжүдүн ажаар өйде ооң тудуун ажыглалга киирерин планнаан. Ногаа шыгжаар комплекстиң иштинге температураны автоматчыткан дериг-херексел өйлээр, ынчангаш ногаа болгаш картофель белен баксыравас. Бир хүнде 500 килограмм ногаа аймаан комплекске болбаазырадыр арга база тургустунар.
Ногаа шыгжамырының тудуунга фермер бодунуң 20 миллион рубль акашазын киириштирген. Арткан капитал салыышкыннар – республика бюджединден.
Бистиң корр.