Июль 6-дан тура, 20 хонук дургузунда, Тывага өртке удур онза чурумну узаткан. Ол дугайында доктаалды республиканың Чазаа хүлээп алган. Документ ёзугаар алырга, онза чурум июль 26-га чедир уламчылаар.
Тываның Арга-арыг болгаш бойдус ажыглалының яамызы тургустунган онза чурум үезинде арга-арыгже чадаг-даа, кандыг-даа транспорт-биле кирерин хораан. Арга-арыгже чүгле тус черниң арга-арыг ажыл-агыйындан азы яамының бодундан алган эрттирилге-биле кирип болур.
Арга-арыгга болгаш ооң чоок-кавы девискээринге одаг кыпсыр, бок болгаш кургаг оът-сиген өрттедир, отка хамаарылгалыг кандыг-даа ажыл чорудары шыңгыы хоруглуг. Ол дүрүмнү хажыдар болза, торгаал хевирлиг административтиг харыысалгага онаажыр деп Арга-арыг болгаш бойдус ажыглалының яамызы демдеглеп турар. Ол ышкаш өртке удур онза чурум үезинде боттарының бажыңнарының девискээринге бок болгаш кургаг сиген өрттедирин, харын-даа доскаарларга болгаш оңгарларга от кыпсырын, ол ышкаш мангалдарга болгаш бичии суугуларга аъш-чем кылырын шыңгыы хораан (ооң иштинде хуу бажыңнар девискээринге, бир эвес чанында оът-сиген азы тудуглар бар болза).
Хүлээп алдынган кызыгаарлаашкыннарның кол сорулгазы — регионнуң бойдус курлавырларын кадагалаары база арга-арыгга өрттүң айыыл чок чоруун хандырары. Өртке удур чурумнуң негелделерин күүсетпээн таварылгада административтиг торгаал онаажыр: хамаатыларга — 40-ден 50 муң рубль чедир, албан-дужаалдыг кижилер- ге — 60-дан 90 муң рубль чедир, албан черлеринге — 600-тен бир сая рубль чедир.
Регионга март 31-ден эгелээн өртке удур сезоннуң эгезинден тура республиканың арга-арыг фондузунуң беш муң ажыг гектар черинге 50 арга-арыг өрттери илерээн. Өрттерниң кол чылдагааннары кижиниң хайындан болуп турар.
Тывага чоокку үеде кургаг болгаш хаттыг агаар болурун метеорологтар медээлеп турар. Ол дээрге өрттүң өөскүп үнеринге таарымчалыг байдал тургустунуп турар. Амгы үеде республиканың арга-арыг фондузунуң девискээринде арга-арыг өрттери илеревээн, ынчалза-даа бо неделяда Доора-Хем арга-арыг участогунга 173 га шөлге өрттү өртчүлер узуткаан.
/ Бистиң корр.
“Шын” №26 2026 чылдың июль 9
Чурукту ТР-ниң албан езунуң сайтызындан алган.
"Шын" солуннуң МАХ-каналынга каттыжыңар: max.ru/join/egenQ...