Өскелерге дөмейлешпес ажылды чорудуп турар тус черниң бараан бүдүрүкчүлериниң бирээзи Херел Владимировна Лутошкина. Ол пордан (керамика) кылыглар кылыр чурукчу.
Бодунуң университет дооскан эртеминиң аайы-биле 2019 чылдан тура пордан кылыгларны — аяк-сава, суй-белектер болгаш янзы-бүрү амыдыралга ажыктыг үүрмек херекселдерни боду холу-биле тудуп, кылып эгелээн. Керамикадан кылыгларының бир онзагай чүүлү чүл дээрге, шупту тыва национал утка-шынарлыг. Чижээ, чечек сугар савада кончуг чараш тыва хеп кедип алган, чоон кара чажын өрээш, мурнунче салып бадырыпкан тыва кыстың дүрзү-хевирин киирген. Ону көөрге, сактырга-ла чараш кыс чечектер тудуп алган ышкаш сагындырар.
– Амы-хууда дериг-херексел садып алгаш, ажылдарны кылып турар мен. Оларымны чогум улус сонуургаар, чарашсынар-даа болза, садып алыкчыларны дыка хөй деп чугаалап шыдавас мен. Керамикадан ажылдың үнезин шынап-ла билир улус каш-даа акша-биле алгаш баар. А чамдыктары, өртээн айтырыпкаш, салып каар боор чорду. Чүге өртээ аар болуп турар дизе, кылыры берге, материалды үне халааш, садыгдан садып албас, тускай чагыдар, белен тывылбас болур. Амдыызында социал четкилерде ажылдарымны салып турар мен. Тускай садыг ажыдып алыр күзел бар, амдыызында арай эрте болуп тур. Чогум мынчага чедир күрүне деткимчезин ап көрбээн мен, ол дугайында боданып тур мен — деп, керамист-чурукчу чугаалады.
Карина Монгуш.
Авторнуң тырттырган чуруктары.
