Бөгүн, январь 6-да, РФ-тиң Президентизи В.Путинниң Тывада бүзүреттирген төлээлери ТР-ниң Олимпийжи курлавырлар школазының директору Владимир Түлүш болгаш Кызылдың М.А. Бухтуев аттыг 1 дугаар школазының директору Татьяна Шарыпова олар хоорайның хөй-ниити организацияларының төлээлери-биле ужурашкан.
Ужуражылганың кол сорулгазы – хөй-ниити организациялары-биле таныжып алыры база волонтержу организацияларның чаа-чаа эгелээшкиннерин деткиири.
Ужуражылганың түңнелинде, дыштаныр хонуктарда волонтержу организацияларның кежүгүннери 2024 чылдың март айда болур Россия Федерациязының Президентизин шилиир соңгулдаже Владимир Владимирович Путинниң кандидатуразын деткиири-биле ажыткан штабтарга ат салыр ажылдарны организастажыры база боттарының чаа-чаа идеяларын штабтарга боттандырып эгелээрин дугурушкан.
Чижээлээрге, Шагаа байырлалының бетинде «Лепим добро» деп манчы тудар акцияны эгелээриниң дугайында чугаалашкан. Ук акцияны бүгү республикага нептередири чугула. Республиканың чурттакчы чонунуң амыдыралын экижидер дугайында аныяктарның янзы-бүрү эгелээшкиннеринге штабтар киржип, оларга янзы-бүрү дектимчени көргүзери планда көрдүнген.
Президентиниң Тывада бүрзүреттирген төлээзи Владимир Түлүш:
– Кайы-даа үеде аныяктар шимчээшкинниң күжү болгаш дөзү чораан. Амыдыралдың мурнуку одуругларында бирги черде аныяктарның шимчээшкини чоруур. Кончуг идепкейлиг аныяктар-биле ужурашкаш, бодумнуң аныяк үелеримни сактып келдим. Бистиң үевисте база студентилер отрядтары дээн шимчээшкиннер хөй турган. Ол отрядтарга бодум киржип чораан мен. Республикавыстың-даа, Россияның-даа келир үези аныяктарның холунда. Бөгүнгү сорулгавыс – аныяктар-биле таныжып алгаш, бот-боттарывысты эки билчип, келир үеже кады план тургузары, аныяктарга шын орукту айтыры болур. Оларның сайзыраары болгаш бурунгаар хөгжүлдези бирги черде. Аныяктарның боттарын долгандыр турар чоок кижилеринге, ада-иезинге безин үлегер-чижек болу бээр кылдыр чагып-сургаары эргежок чугула. Идепкейжи аныяктарның бурунгаар баскан изин оларның эш-өөрү, дөргүл-төрели кандыг-даа дадагалзал чокка изээр ужурлуг.
Президентиниң Тывада бүзүреттирген төлээзи Татьяна Шарыпова:
– Бөгүн чамдык улус-биле чаа таныжып алдывыс, а бир чамдыызы-биле база катап ужурашканывыс бо. Ужуражылгага республиканың волонтержу шимчээшкиннерниң удуртукчулары шупту келди. Эң-не идепкейлиг аныяктар мында чыглып келген. Олар кады өөренип, ажылдап турар эш-өөрүн шын орукче эдертип болгу дег тура-соруктуг улус-тур. Ынчангаш, бис улуг улус оларның-биле сырый харылзаалыг ажылдаар ужурлуг бис.
А. ОНДАР.
Буян ООРЖАКТЫҢ тырттырган чуруктары.
