«Тывахарылзааинформнуң» 80 чыл ою
Октябрь 29-та Виктор Көк-оол аттыг Национал хөгжүм-шии театрынга «Тывахарылзааинформ» АН-ниң тургустунганындан бээр 80 чыл оюн демдеглээн байырлыг хурал болган.
Аңаа ТР-ниң Чазааның Даргазының оралакчызы Олег Лукин, ТР-ниң Дээди Хуралының депутады Белекмаа Мунге, ТР-ниң чурагайлыг хөгжүлде сайыды Идегел Моңгуш база бүгү республиканың харылзаа шугумунуң ажылдакчылары болгаш оларның чоок кижилери Национал театрның көрүкчүлер залын долдур олурупкан.
Национал театрның фойезин харылзаа чериниң баннерлери болгаш делгелгези-биле каастаан.
Алексей Куулар, Артыш Ламажап, Орлан Ооржак, Аяна Сарыглар, Эрес Сан-оол база харылзаа чериниң аңгы-аңгы адырларында ажылдап чоруур өске-даа ажылдакчыларга ТР-ниң Баштыңының өөрүп четтириишкин бижиктерин Чазак Даргазының оралакчызы Олег Лукин тывыскан. Каа-Хем кожууннуң харылзаа чериниң ажылдакчылары Надежда Кузьмина биле Георгий Спирин олар ТР-ниң Баштыңының Хүндүлел бижиинге төлептиг болганнар.
Тыва Арат Республиканың Совет Эвилелинге эки тура-биле каттышкандан бээр 80 чыл оюнга тураскааткан юбилейлиг медальдарны харылзааның хоочуну Дмитрий Донгакка база Мөңгүн-оол Кууларга тывыскан.
ТР-ниң Дээди Хуралының болгаш Чурагайлыг хөгжүлде яамызының өөрүп четтириишкин база хүндүлел бижиктерин харылзаа чериниң шылгараңгай ажылдакчылары алган.
Шаңналдар соонда «Тывахарылзааинформ» АН-ниң чиңгине директору Сылдыс Хертек байыр чедирип сөс алган.
«80 чыл бурунгаар, октябрь 29-та областың харылзаа чери тургустунган. Бо хүнге чедир харылзаа шугумунуң ажылы хүнден хүнче сайзырап, чаа-чаа чүүлдер немежип орар. Харылзаа чери республика-биле эгин-кожа хөгжүп чоруп орар. Бо хүннерде харылзаа шугумун ажыглавайн турар хамааты кайда-даа чок. Коллективтиң 40 хуузу талантылыг аныяктардан тургустунганы биске улуг чоргаарал. Кады ажылдап чоруур коллективимге ам-даа бурунгаар хөгжүлдени, чедиишкиннерни күзедим. Байырлалда чыглып келген харылзаачылар шупту аңгы-аңгы үелерде ажылдап чораан силер. Харылзаа шугумунуң хөгжүлдезинде силерниң үлүг-хууңар улуг. Эрткен үевис дээш ук адырның таваан салган хоочуннарывыска өөрүп четтиргенивисти илередир-дир бис" — деп, Сылдыс Хертек чугаалаан.
Айдың ОНДАР.
Буян ООРЖАКТЫҢ тырттырган чуруу.
«Шын» №83 2024 чылдың октябрь 30
