Владислав Ховалыг Иркутск хоорайда Россияның болгаш Моолдуң регионнарының бирги шуулганында киржип турар. Шуулганны ийи чурттуң Экономика яамылары эрге-чагырга, бизнес төлээлериниң болгаш эксперт ниитилежилгезиниң аразында дорт чугаа чорударының улуг хемчээлдиг шөлү кылдыр организастаан.
Шуулганның программазында пленарлыг хурал болгаш садыг-экономиктиг кады ажылдажылганың элээн каш улуг чугаалажылга шөлдери кирген. Шуулган үезинде Россия—Моол ажыл-агыйжы чөвүлелдиң хуралы база ийи чурттуң регионнарындан бүдүрүлгелерниң улуг делгелгези база болуп эртер. 2030 чылга чедир регионнар аразында кады ажылдажылганы хөгжүдер программаны шуулганның төнчүзүнде бадылаар.
Тываның Баштыңы шуулганның пленарлыг хуралынга Моолдуң эрге-чагыргазы болгаш бизнези-биле регионнуң кады ажылдажылгазының байдалынга болгаш келир үезинге хамаарышкан илеткелди таныштырган. Республика бо хүнде аңгы-аңгы аймактар-биле кады ажылдажылга дугуржулгаларын чарып, культура, өөредилге, туризм, садыг-саарылга талазы-биле харылзааны туткан.
Россия биле Моол аразынга чаа транспорт коридорун тургузарынга Тыва идепкейлиг киржип турар. 2025 чылда Моолдуң төвү-биле авиааргыжылга ажыттынган. Федералдыг Чазактың деткимчези-биле Моолдуң автооруктарынга каттышкаш, улаштыр Кыдаттың транспорт четкизинче үне бээр кызыгаар чоогунуң каайлы-логистика инфраструктуразын тудуп турар.
Россияның Президентизиниң даалгазы ёзугаар РФ-тиң Транспорт яамызы-биле кады Тываны таварып, Моолче демир-оруунуң төлевилелин ажылдап кылып турар. Алызында бо демир-орук Соңгу далай оруунуң порттарын азы Аравия далайның порттары база Индий океан акваториязы-биле Арктика коридорун каттыштырган Евразийжи транспорт инфраструктура системазын тургускан кол шугумнуң бирээзи апаар ужурлуг.
Шуулган үезинде Тываның Чазаа биле «Chinggis Khaan Group» КХН (Моол) «China Railway No.5 Engineering Group» тудуг компаниязы — кыдат партнёру-биле республика девискээринге транспорт болгаш энергетика инфраструктуразының объектилерин тударынче, ол ышкаш казымал курлавырлар болбаазырадылгазынга хамаарышкан төлевилелдерже киржир аргаларны өөренип көрген кады ажылдажылга дугуржулгазынга аттарны салыры планнаттынган.
А. МОНГУШ.
Чурукту ТР-ниң Чазааның парлалга албанындан алган.
“Шын” №47 2025 чылдың декабрь 4