Июль 22-ниң хүнүнде эртен эрте Кызыл хоорайның аэропортунуң чоок-кавы девискээринге тыва маадырлыг тоолдарда тоолдааны дег, “кижи бажы кизирт, аът бажы козурт” болган. Ол дээрге Тываның найысылалының чурттакчылары, албан-организация черлериниң коллективтериниң ажылдакчылары Россияның Маадыры Мерген Доңгакты уткуп чедип келгеннери ол.
Россияның Маадыры деп атка тываларның аразындан ийи кижи төлептиг болган. Баштайгызы Россия Федерациязының камгалал сайыды Сергей Шойгу, ийигизи 55 дугаарлыг даг-адыгжы бригаданың салбыр командири, эрес-дидим дайынчы, Украинада чоруп турар тускай дайынчы операция үезинде эрес-дидим чоруун, командир арга-мергежилин көргүскен улуг сержант Мерген Донгак. Улуг сержант Мерген Донгакка Россияның Маадыры аттың алдын сылдызын Россияның камгалал сайыды, армия генералы Сергей Шойгу тывыскан. Бо дээрге хөй эвес санныг тыва чоннуң төөгүзүнде онзагай болуушкун.
Тускай шериг самолётка төрээн чуртунче ужуп кел чоруур маадырны чон дыка манаан. Ооң самолёду аэропортка хонупканы дыңналы бээрге, Россияның болгаш Тываның күрүне туктарын, өңнүг агаар бөмбүктери болгаш айыраң чараш чечектер туткан улуг, бичии кижилер аэропорттуң мурнунга чыглы берген, Кызыл гарнизонунуң шериглери чыскаалыпкан. Кызылдың аэропортундан Россияның Маадыры Мерген Донгак үнүп кээрге, күчүлүг “Ура-а-а!”-биле чон ону уткуп алган.
Россияның Маадыры Мерген Донгакка сөстү бээрге,
– Меңээ тывыскан шаңнал мээң дайынчы эштеримниң, бүгү тыва чонумнуң база шаңналы-дыр – деп, сүрээдеп чугаалаан.
Төрээн чуртунуң камгалакчызы төлептиг эр кижи кылдыр кижизидип өстүрүп кааны дээш Мерген Донгактың авазы Светлана Очур-ооловнага, ачазы Грин Николаевичиге, оглун – маадырны деткип чорууру дээш ооң ажы-төлүнүң авазы, кадайы Людмила Михайловнага өөрүп четтиргенин чоннуң мурнундан республиканың Чазааның Даргазының оралакчызы Тимур Куулар, Күрүне Думазының Даргазының оралакчызы Шолбан Кара-оол олар илереткен.
Россияның Маадыры Мерген Донгак ийи дээди эртемниг. Шериг-далай флодунга шериг албан-хүлээлгезин эрттирген соонда, Тываның күрүне университедин дооскан. Ийиги дээди эртеми – юрист, Россияның Улустарның найыралы университеттиң 2015 чылда доозукчузу.
Шаңгыр-оол МОНГУШ.
