«Бойдустуӊ онза камгалалдыг девискээрлеринде термоточкалар» деп Telegram-канал ажылдап эгелээн.
Октаргайда ужуп турар спутниктерниӊ тырттырган чуруктарын программа анализтеп турар. Кайы-бир черде өрт хып, өөскүп келген болза, медээни дораан дамчыдар. «Бойдустуӊ онза камгалалдыг девискээрилеринде термоточкалар» https://t.me/signal_na_oopt. деп каналда медээни 4 шак болгаш-ла чаартып турар. Россияныӊ 11 субъектизиниӊ девискээрин хаара туткан.
«Арга-арыг өрттенир чорукту болдурбазы-биле, шак бо ышкаш арганы тургузар деп идеяны шагда-ла сайгарып чугаалажып келген. Программист волонтерларныӊ ачызында бо каналды тургускан. Арга-арыгга өрт тыптып келирге-ле, дарый хемчег ап, ону өжүреринге дузалаар дээрзинге идегеп турар бис. Термоточка бүрүзү өөскүп үнген улуг өрт эвес, а хып турар одаг азы от-көстүг чер бүрүзү деп айтып каары чугула. Ынчангаш Telegram-каналдыӊ медээлери, хамыктыӊ мурнунда, барып хынап көөр ужурлуг черни айтып турар. Өрт халавынга удур эӊ-не чогумчалыг демисел — өрт улуг девискээрге калбарып өөскүвээнде, ооӊ хып үнген дөзүн эге чадазында узуткаары» – деп, Бүгү делегейниӊ бойдус камгалаар фондузунуӊ Алтай-Саян экологтуг регионнарында арга-арыг программазыныӊ координатору Виктор Никулкин тайылбырлаан.
Бо каналды Бойдустуӊ онза камгалалдыг девискээрлериниӊ, Бойдус курлавыр яамыларыныӊ, бойдус камгалаар албан черлериниӊ ажылдакчыларынга дузалаары-биле тургускан. Кайда өрт хып эгелээнин олар дораан көрүп алыр.
Алтай крайныӊ «Салаир» деп национал сесерлииниӊ ажылдакчылары телеграм-каналдыӊ медээзи-биле ийи термоточканы көрүп кааш, аӊаа чеде бээрге, өрттенип турар ийи тудугну өртчүлер өжүрүп турар болган.
Telegram-канал амдыызында заповедник, заказник, онза камгалалдыг девискээрлерде термоточкаларны хынап көрүп турар. Бир эвес бо арга-дуржулга чедиишкинниг болур болза, бо төлевилелди сайзырадып, өске-даа регионнарныӊ девискээрлерин хаара тудар.
Бүгү делегейниӊ бойдус камгалаар фондузу бо төлевилелди ажылдап кылган программистерге, волонтерларга, коллегаларынга өөрүп четтиргенин илередип турар.
Татьяна Иваницкая, Россияныӊ WWF төлээ чериниӊ парлалга секретары.
Р. Демчик очулдурган.