Тыва Республиканың Садып алыышкын адырынга дугуржулга системазын өйлеп таарыштырарының яамызы 2024 чылда кылган ажыл-ижин болгаш келир чылда сорулгаларын таныштырган.
Тыва Республиканың Садып алыышкын адырынга дугуржулга системазын өйлеп таарыштырарының яамызы 2024 чылдың 11 айларында күрүнениң болгаш муниципалдыг чагыкчыларның чагыгларын ёзугаар эге өртээ 14 102 436,94 муң рубль түңнүг 5312 адааннажылга садыглаашкыннарын электроннуг садыглаашкын шөлдеринге чогуур өйүнде салган. Оларның иштинде ниитизи-биле 9 027 764,97 муң рубль түңнүг 3933 керээни чарган. 2023 чылга деңнээрге, садыглаашкыннарның саны 6 хуу көвүдээн (2023 чылдың түңнели-биле эге өртээ 16 861 904,78 муң рубль түңнүг 4984 адааннажылга садыглажыышкыннарын салган).
Бо үе дургузунда ТР-ниң Күрчагыг яамызының организастааны садыглаашкыннарга 11804 кижи киришкен, оларның 3933-биле керээлерни чарган.
Ол ышкаш садып алыышкыннарның санынче 8 национал төлевилел, 1 күрүне программазы база 1 федералдыг тускай программа кирген. Ооң түңнели-биле эге өртээ 3 348 485,55 муң рубль түңнүг 312 садып алыышкынны чоруткан. Ниити өртээ 3 239 750,29 муң рубль түңнүг 312 керээни чарган. Ниити камналгазы 108 735,26 муң рубль болган.
Капиталдыг тудуг объектилеринге дараазында садып алыышкыннарны чоруткан:
Ниити өртээ 2 913 965,19 муң рубль түңнүг 151 садып алыышкынны чоруткан. Ооң иштинде ниити түңү 2 823 057,90 муң рубльге 180 объектиниң капитал тудуг ажылдарын күүседиринге 151 күрүне болгаш муниципалдыг керээлерни чарган. Капиталдыг тудуг объектилеринге садып алыышкыннардан 90 907,29 муң рубль камналгалыг болган.
Дериг-херекселдер болгаш өске-даа барааннар садып алырынга: ниити өртээ 432 909,45 муң рубль түңнүг 161 садып алыышкыннарны чоруткан, оларның иштинде 415 081,47 муң рубльге дериг-херекселдер болгаш өске-даа барааннар садып алырынга 161 керээни чарган. Дериг-херекселдер садып алырынга чоруткан садып алыышкынның камналгазы 17 827,97 муң рубль болган.
Чурттуң политиктиг болгаш экономиктиг байдалы быжыг эвес болганындан күрүне программаларының болгаш национал төлевилелдерниң боттанылгазын харыылап турар күүсекчи эрге-чагырга камнап алган акша-хөреңгиниң хөй кезиин федералдыг бюджетке эгиткен. Ынчалза-даа күүсекчи эрге-чагырганың федералдыг органнарының чөпшээрели ёзугаар камнап алган акша-хөреңги-биле немелде дериг-херекселдер садып алыр аргалыг болган: ТР-ниң Арга-арыг ажыл-агыйы болгаш бойдус ажыглалының яамызынга ийи автофургонну, ТР-ниң Өөредилге яамызының албан черлериниң хереглелдеринге аңгы-аңгы дериг-херекселдер (үн дериг-херекселдери, лазер-биле кезер станоктар, ноутбуктар зарядкалаар тележкалар, прожекторлар, магниттиг самбыралдар, видео болгаш фото-камералар, аудио-аппаратуралар, интерактивтиг медиа-гидтер дээш өске-даа), ол ышкаш «Культураның хөгжүлдези» күрүне программазының чорудуу-биле Тыва Республиканың Национал музейинге видео хайгаарал системазын тургускан, ТР-ниң Кадык камгалал яамызынга медицина реабилитациязы болгаш санаторлуг курорт эмнээшкиннеринге тускай программа езугаар дериг-херекселдер садарынга ажыглаан.
2024 чылдың 11 айларында муниципалдыг чагыкчыларның акша-хөреңгизи-биле эге өртээ 606 404,32 муң рубль түңнүг 341 садып алыышкынны чоруткан, 433 062,28 муң рубль түңнүг 240 садып алыышкыннар керээлерин чарган. Ооң камналгазы 63 621,25 муң рубль болган.
2025 чылда садып алыышкын адырынга мурнадыр көөр кол угланыышкын — Тыва Республиканың регионалдыг информастыг системазын чаартыры. Дугуржулга чорудулгазын чурагайжыдар болгаш чагыкчылар системазының ажылын бөдүүнчүдери-биле садып алыышкын адырынга регионалдыг информастыг системаны сайзырадыры ук адырның кол сорулгазы. Амгы үеде чагыкчыларның шупту дугуржулгалары саазын хевирде кээп турар болгаш, ажылдакчылар ону хол-биле хынап турар, ол чүүл чурагайлыг хөгжүлдениң угланыышкыннарынга дүүшпейн турар.
Бистиң корр.
“Шын” №99 2024 чылдың декабрь 25