Бистиң күрүневисте үндүрүглерден чиигелделер ап болурунуң хөй янзы хевирлери бар. Олар чурттакчы чоннуң амыдыралының шынарын кэижидеринче угланган болуп турары онзагай. Чижээ, эмнээшкин, өөредилге дээш төлевирлер кылганда чиигелделер ап болур. Оон аңгыда чоннуң кадыының байдалын экижидериниң бир аргазы – спортка хандыкшып турарларга база үндүрүглерден чиигелделер ап болур арга тургустунган. Бо дугайында “Сүбедей” спорт өргээзиниң удуртукчузу сураглыг тыва спортчу Саян Ондар бодунуң социал четкилеринге делгереңгей тайылбырлаан:
“Өңнүктер, бөгүн силерге спорт залынга кичээлдеп барганы дээш чарыгдаан акша-хөреңгивистиң чамдыызын эгидип алыр аргалыг апарганывыстың дугайында силерге чугаалаксап тур мен. Бир эвес 2022 чылда фитнесче азы спортчу секцияларже 120 муң рубль чедир чарыгдаар болзуңарза, ол түңнүң 13 хуузун эгидип ап болур силер. Ынчалза-даа дедир эгидип ап болурувус төлевирниң эң-не улуг хемчээли 15 600 рубльден эртпес. 2022 чыл төне бээрге, 2022 чылдың 3-НДФЛ үндүрүг декларациязынга үндезилеп, айыттынган төлевирни ап болур. 2022 чылдың төнчүзүнге чедир ук төлевирни алыр дизе, ажыл берикчизинге билдириишкин киирер апаар.
Чугула чүүл!
Күш-культура, спорт талазы-биле албан чери тодаргай негелделерге дүгжүр, РФ-тиң Спорт яамызының бадылааны даңзыже кирип турар болуру негеттинер. Бистиң «Субедей» спорт комплекизи ол даңзыже кирип турар дээрзин дыңнадып каайн. Ол даңзы-биле дараазында шөлүлге дамчыштыр таныжып ап болур силер: https://minsport.gov.ru/2022/doc/25052022/Итоговый_пе..
Оон аңгыда чүгле бодунуң эвес, а ажы-төлүнүң база спортчу кичээлдер, секцияларже чарыгдааны акша-хөреңгизиниң 13 хуузун эгидип ап болур. Ындыг таварылгада, баш бурунгаар долдурар документилер даңзызынче уругларының төрүттүнгениниң дугайында херечилелдерин немеп каар ужурлуг. Назы четпээн уругларга хамаарыштыр алыр спортчу төлевирниң эң-не улуг хемчээли 6500 рубль”.