Тыва Республиканың сүлде демдээниң бирээзи – ыдык күрүне демдээ болур Тываның тугунуң хүнүн албан-ёзунуң байырлыг хүннериниң бирээзи кылдыр тургузарының дугайында дилегни ТР-ниң Баштыңы Владислав Ховалыгның адынче эрткен чылын “Тываның энерелдиг чүректери” хөй-ниити аныяктар шимчээшкининиң идепкейжи бөлүүнден дилег кирген. Тываның Баштыңы ол айтырыгны чугула кылдыр көргеш, сентябрь айның 17-ниң хүнүн Тываның тугунуң хүнү кылдыр тургузар дугайында саналды ТР-ниң Дээди Хуралынче саналдап кииргеш, чүс хуу деткимчени алган.
“Бөгүн Тыва Республиканың ыдык күрүне демдээ болур Тываның тугунуң хүнүн демдеглеп турар бис. Тываның тугунуң хүнү чаңгыс чер чурттугларывыстың ажыл-ишчи чедиишкиннериниң болгаш маадырлыг чоруктарынга мөгейигни илередип, чуртувустуң эрткен төөгүзүнге хүндүткелди, келир үеде ооң сайзыралынга бүзүреливисти күштелдирип, Төрээн черинге кызыгаар чок ынак, ону хүндүлээр кижилерни каттыштырып турар” – деп, Владислав Ховалыг социал четкиде бодунуң арнында бижээн.
Россияның Чурукчулар, Журналистер эвилелдериниң кежигүнү, сураглыг чурукчу Оюн-оол Доктугу оглу Сат Тываның тугунуң дөзевилелиниң автору болуп турар. 1992 чылдың сентябрь 17-де ону республиканың Дээди Соведи бадылаанын сагындыраал.
Чылдың-на күстүң бо чараш үезинде Дөгээ дааның кырынга Тываның ыдык сүлдези –Тукту киискидер акцияны албан-организациялар, студентилер, сургуулдар доктаамал чорудуп турар.
Бөгүн аңгы-аңгы яамыларның ажылдакчылары автомашиналарга туктарын кадап алгаш, эртенгиниң 09.00 шакта Улусчу чогаадылга бажыңындан халдып үнгеш, флешмобту организаастаан.
“Бөгүн, Тывавыстың ыдык тугунуң хүнүнде, республиканың школаларында класс шактары, интернет четкизинде флешмоб, Национал музейде фото-делгелге эртип турар. Бис автомашиналарда туктар кадааш, халдырын база Дөгээ кырынче улуг хемчээлдиг тукту үндүрер акцияны эрттирдивис” – деп, ТР-ниң Юстиция яамызының специализи Анай-Хаак Сарыглар чугаалаан.
Кандыг-даа чурттуң сүлде демдээниң бирээзи болур тукта кирген өңнер ханы утканы илередип турар болур. Тываның тугунда база ындыг. Алдын азы сарыг өң – байлакшылдыг амыдыралды, сарыг шажын чүдүлгевисти, ак-көк өң – аяс дээрни, тайбыңны, бедик хей-аътты, ак өң – тыва чоннуң арыг-чаагай сеткилин илередип турар.
Тывавыстың ыдык сүлдези– Тываның тугунуң хүнү-биле!
Бистиң корр.
Чуруктарны интернеттен алган.
“Шын” №71 2024 чылдың сентябрь 18
