Республиканың спортчу амыдыралынга бо 2022 чылда көскү ийи болуушкун болган: хостуг хүрешке Россияның XXX чемпионадының Тывага эрткени, тыва мөгелерниң Моолдуң Наадымының хүреш маргылдаазынга эң-не баштай киришкени.
Бүгү Моолдуң Наадымының хүреш маргылдаазынга мурнуку чылдарда чүгле моол мөгелер хүрежип турган болза, 2022 чылда өске чурттардан мөгелер киржирин чөпшээрээн. Ону моол мөгелерниң күш-шыдалынга, арга-мергежилинге, тиилеттирбезинге бүзүрел деп чугаалап болур.
Моолдуң Наадым байырлалынга хүреш маргылдаазынга тыва 20 мөге киришкен. Оларның аразындан Чаан мөге Сайын-Белек Түлүш, Арзылаң мөгелер Седен-Очур Кара-Сал биле Сылдыс Монгуш үшкү салыгже киир хүрешкеннер. Моолдуң эң шыырак 1024 мөгелери киришкен хүрешке чаңгыс салыг ажылары безин дыка берге деп моолдар боттары безин санап турарлар. Ынчангаш бистиң мөгелеривис чедиишкинниг хүрешкен деп болур.
Бистиң мөгелеривистиң Моолдуң Наадым хүрежинге киришкенинге тываларның хамаарылгазы аңгы-аңгы. Чүге дээрге чеже кижи-дир ол хире бодал-сагыш бар боор. “Ажырбас, кыска үе иштинде белеткенгеннер, келир чылын черле байза киир тударлар боор, тыва мөгелеривис” – деп, Артыш Ховалыг, “Ам даа эки күштүг белеткел херек. Чүгле бурунгаар, мөгелер” – деп, Эртине Данзы-Белек "ВКонтакте" социал четкиге бижээннер. Оларның-биле чөпшээрежип болгу дег.
Бистиң мөгелеривис моол аймактарның хүреш маргылдааларынга шүглүп турар апаргылаан болгай. Бүгү Моолдан шилиттинген эң шыырак 1024 мөге аразынга тыва мөгелер ачыр-дачыр тудушканы – хоомай эвес чедиишкин.
Чаан мөге Сайын-Белек Түлүш, Арзылаң мөгелер Седен-Очур Кара-Сал биле Сылдыс Монгуш оларның үшкү салыгже киир хүрешкени Моолдуң Наадымының хүреш маргылдаазынга Тываның мөгелериниң келир үеде шүглүрүнче баштайгы базым.
Шаңгыр-оол МОҢГУШ.
Чурукту Цэдэвийн Содномдорж арнындан алган.