ИТПИК КУЖУМ
Часты баштай мактап ырлаар,
Чараш кужум, итпик кужум.
Чааскаанзырааш, эжин кый дээр,
Чаптанчыг сен, итпик кужум.
Изий бээрин эндевес-даа,
Итпик кужум чарлап ырлаар.
Частың чечээн саглаңнадыр
Чаптап ырлаар чараш кужум.
– Үнүш, бойдус оттуп келди,
Үнүңер! – деп кыйгы салып,
Арыг иштин, аалдар чанын
Аян киирип ырлаар кужум.
БЫЗААНЧЫМ
Сагыш-сеткил доюлдурар сыгыдым
Часкарып ап, үдеп алыр бызаанчым.
Дыңнаан кижи уярадыр аялга
Тывылдырып, үндүрүп кээр бызаанчым.
Доруг-Доюм кудуруундан хылдап каан,
Тоолда кирген эткир үннүг бызаанчым.
Каргыраамны, сыгыдымны өттүнер
Кайгамчыктыг өткүт үннүг бызаанчым.
Көвей чонга аян тудуп, үдей бээр
Хөрүк ышкаш тыртып ойнаар бызаанчым.
Хөөмей, сыгыт, каргыраамның аяны,
Хөгжүм эди – аът баштыг бызаанчым.
ОО, ЧҮРЭЭМ
Оо, Чүрээм, чүге ынчаар эшкедедиң?
Оожургап көр. Оттуум сенден дилеп көрейн.
Мынча ботка чаңгыс мени чүктеп келгеш,
Мырыңай туруп, шааң төнүп калган ол бе?
Ада-ием чаяап кааны чаңгыс Чүрээм,
Амыр-дыш чок диртигейн-дир соп-ла чор сен.
Ажыл-ижим, ада-чурт дээш, ажы-төл дээш
Амыр-дыш чок кылып чор мен, күжүр Чүрээм.
Чаңгыс-ла сээң шааң төнмейн чоруур болза,
Шаптараазын кайын меңээ таваржыр деп.
Ашкан хүннүң херелдерин көрүп келдим –
Ам-даа көңгүс аныяк бис, күштүг-дүр бис.
Ажыл-иштен адырылбайн, кады чоруул.
Оо, Чүрээм, амыдырал мөңге эвес.
Адак соонда сөөлгү катап кырлаш дээриң –
Назынымны үзе шиидер согууң болур.
Кайы хире чурттаар кылдыр бурган чаяан?
Хая көрбээл, ону сактып чорбаал, Чүрээм.
Амыдырал агымынга дамдылар бооп,
Ам-даа демниг демисежип чоруул, Чүрээм.
Мөңгүн-оол КУУЛАР,
ТР-ниң школаларының алдарлыг башкызы.
“Шын” №32 2024 чылдың апрель 27