Өөредилге сайыды Алексей Храмцов Шагаан-Арыгның 2 дугаар школазының ада-иелери болгаш башкылары-биле ужурашкан. Ук школада амгы үеде капитал септелге ажылдары чоруп турар.
Сайыт бодунуң социал четкиде арнында ада-иелерниң болгаш башкыларның сагыш-сеткилиниң дүвүрелин хүлээп ап, деткип турарын бижээн. Ужуражылга үезинде дараазында айтырыгларны чугаалашкан:
Бирээде, капитал септелгеже федералдыг программа-биле киргенин болгаш ук төлевилелче кирерде кандыг күжениишкиннер кылганын тайылбырлаан.
Ийиде, кылдынган ажылдар болгаш ажыл үезинде тургустунуп келген берге айтырыгларны чугаалашкан.
Үште, хүлээникчи организацияны чүге солупканын, септелгени доозар дизе, оон ыңай чүнү кылып болурун тайылбырлаан.
Ужуражылганың болган чылдагааны ада-иелерге кымдан-даа болза барымдааларны болгаш тайылбырны дыңнаары чугула болган. Оон аңгыда, ажылды күүседип турар Рафаэль Тагиев база ажык чугааже үнүп, ажылдың хемчээлин болгаш берге айтырыгларын тайылбырлаан. Ажык чугаага ук школаның доозукчузу, Улуг-Хем кожууннуң чагырга даргазы Буян Балбак база киржип, чурттакчы чоннуң айтырыгларынга харыылап, школа инфраструктуразының сайзыралының талазы-биле тайылбырны берген.
“Ужуражылгага келгеш, мени болгаш мээң коллегаларымны дыңнаан ада-иелерге, хоорайның чурттакчы чонунга болгаш башкыларга шуптузунга өөрүп четтирип тур мен. Ада-иелер идепкейжи чоруун көргүзүп, боттарын дүвүредип турар янзы-бүрү айтырыгларны салганынга өөрүп тур мен. Ол дээрге 5 хүн өөренир чурумче шилчиири, септелгениң доостуру, школа девискээрин чаагайжыдары, уругларны чедирери, школаның техниктиг ажылчыннарын дериг-херексел-биле хандырары болгаш өске-даа айтырыглар болур” – деп, сайыт Алексей Храмцов өөрүшкүзүн илерткен.
Шагаан-Арыг хоорайның болгаш кожууннуң өөредилге инфраструктуразын чаартыры дээрге ук девискээрниң социал-экономиктиг хөгжүлдезинче улуг базым дээрзин билип алыры чугула. Дараазында чылын “Өөредилге системазының школалар чаартылгазы” деп программаның ачызында хоорайның гимназиязын база чаартыр.
Чугаалажылгага үргүлчү ажык болуп, ук объектини бодунуң хууда контрольунда алганын сайыт демдеглээн. Септелге ажылдарының канчаар чоруп турарын хүнүң-не илеткеп, информация ажылын идепкейлиг чорударын удуртулгага дааскан.
Чуруктарны интернет четкизинден алган.
