Чоокта чаа Кызылдың 17 дугаар ортумак школазынга российжи чадаг-тергежи Юрий Валентинович Кочуров-биле солун ужуражылга болган.
70 хар ашкан чадаг-тергежи бодунуң хар-назынынга дүүшпес: аныяксыг, кончуг эрес, чугаакыр, баштак кижи болду. Ол 15 чыл ажыг үе иштинде чадаг-терге мунуп алгаш, оранны одуртур, делегейни дескиндир аян-чорук кылып чораан.
Ол бир херээжен кижи-биле таныжып алгаш, Тверьден Архангельскиге чедир тергелиг четкенин, ол-ла хевээр терге ооң ынак спортчу аян-чоруу болуп артканын баштактанып чугаалады. Дараазында чылын Сочиден Севастопольга чедир чорааш, терге мунарынга ооң мергежили бедип, Израиль, Вьетнамче болгаш ССРЭ-ниң янзы-бүрү хоорайларынга четкен. 2018 чылда Москвадан Венецияга чедип, ооң соонда Сербияга чедир 200 километрни бүдүн хүн-дүн иштинде эрткеш, рекордту тургускан болуп турар.
Чедип алган чедиишкиннеринге тура дүшпейн, ам-даа чадаг-тергелиг аян-чорук кокпазын уламчылаар сорулгалыын чугаалап турар. “Чогум кандыг мергежилдиг, каяа ажылдап чораан силер?” – деп, мээң айтырыымга Свердловск облазынга төөгү эртемин башкылап, уран чүүлге бодунуң онзагай талантылыы-биле Уралга баян башкылап, хөгжүм херекселдериниң оркестрин удуртуп чораанын харыылады.
Юрий Валентинович бодунуң аян-чоруунуң дугайында делгереңгейи-биле чыылганнарга тайылбырлап, гармошказын туткаш, ойнап, ырлай бээрге, черле ыр-шоорга, хөгжүмге болгаш спортка салым-чаяан чедер кижи-дир деп бодал башка кирди. Бүдүн зал-биле сураглыг ыры “Катюшаны” бадырыптарга, көрүкчүлерниң хей-аъды көдүрлүп, оларның үзүктел чок адыш часкаашкыны ооң талантызынга улуг шаңнал, мөгейиг болганын чугаалаар апаар.
Аалчыны школаның коллективи чылыы-биле аяк шайлыг уткуп, өөрүп четтириишкинниң чылыг сөстерин чугаалааннар.
Аян-чорукчунуң кокпазы менди-чаагай уламчылап, оран-чуртун эргип, улус-чонун магададып-ла чорзун деп йөрээл-биле доостум.
Раиса ОНДАР, башкы, чогаалчы, журналист, РФ-тиң Улус өөредилгезиниң тергиини, ТР-ниң өөредилгезиниң алдарлыг ажылдакчызы.
«Шын» №89 2023 чылдың ноябрь 22
![](https://sun9-63.userapi.com/impg/Tx4-OrLpRpko8Lix2ZElN8qs_5h0kkdKd5oYMw/BjwkQAj1tdE.jpg?size=810x606&quality=95&sign=fcf795a6bbfeb3ba07013276133f9732&c_uniq_tag=UTIV-G7oXPUnd58H0NDiVdSmRWhbqMnAuWdWwV_aB-I&type=album)
![](https://sun4-20.userapi.com/impg/aK3u1UuMIi3-F1nSeJborFXXqk--4V_0Ha_tLw/wJlvv5YVHKI.jpg?size=807x539&quality=95&sign=c7a969b80db74b27b6c3b0ed58c8338e&c_uniq_tag=fk20R8MxDn6tJS1kaIQ_dXtVgqZWFWhQuBmEzgUhc98&type=album)
![](https://sun4-18.userapi.com/impg/BRHJmUM9NmO315C2gPhlIgPWV2imb6U6UIvkGA/wIvthMl70hY.jpg?size=807x350&quality=95&sign=fd0d40c5d2b1c4b8f8dd42a8149288b4&c_uniq_tag=ThMus-MA9kr3ZIbYsqa1xTU4dydGm100HI5hP-9V5RQ&type=album)