Тываның Чазак Даргазы Владислав Ховалыг 2023 чылда Дээди Хуралга Айыткалынга I дугаар Чайгы оюннарны эрттирерин Спорт яамызынга дааскан турганын сагындыраал. Ол ышкаш Тываның чурттакчыларының чартыы 50 хире хуузу спорт болгаш күш-культура-биле өңнүктежип, Россияның спортчу регионнарының лидерлер санынче кирип турар.
Спортчу Тывага I дугаар Чайгы оюннарны 4 аңгы назы-харлыг бөлүктүң спортчуларынга 9 аңгы хевирге маргылдааларны организастап эрттиргенин онзалап, демдеглевес аргажок. Владислав Ховалыгның чөптүг болгаш шын шиитпирни үндүргенин, аңаа өөрүп четтиргенин илередип турары спортчуларның өөрүшкү-маңнайлыг, хөглүг арын-шырайындан илдең.
Спортчуларны назы-хар аайы-биле 4 аңгы бөлүкке – 17 харга чедир, 18–39 харлыг, 40–55, 56-дан өрү кылдыр хуваап, спорттуң 9 аңгы хевиринге – хол бөмбүү, бут бөмбүү, баскетбол, стол теннизи, шыдыраа, шашки, ГТО, чиик атлетика болгаш гиря спортунга 18 муниципалдыг тургузугдан 7500 ажыг азы бир командадан 448 кижи киришкен. Оюннар июнь 7-ден июнь 15-ке чедир үргүлчүлээн. Улуг хемчээлдиг хемчегниң кол организакчылары – Тываның Чазаа, ооң иштинде Спорт яамызының чаңгыс чер чурттугларынга спортуң янзы-бүрү хевирлеринге күчү-күжүн шылгап, ойнап-хөглеп алырынга таарымчалыг байдалдарны тургусканын хоочун-даа, элээди-даа спортчу үнелеп турар. Маргылдаалар бедик деңнелге эрткен дээрзин изиг-изиг адаан-мөөрей оюннарның түңнелинден көскү.
Кижи бүрүзү бодунуң төрээн кожуунунга онзагай белектерни чаалап алыр дээш кызып турганы чугаажок. Каш хүн үргүлчүлээн оюннарның түңнелинде Чөөн-Хемчик кожууннуң спортчулары 18 команда аразындан күштүглерниң күштүү, аваангыр-кашпагайы-биле шылгарап, тиилекчилер болган. Олар төрээн кожуунунга ангар спорт залының тудуун бүзүрелдии-биле чаалап алганнар. II-ги черге Улуг-Хем кожуун төлептиг болуп, кылымал шыктыг бут бөмбүү ойнаар шөлчүгеш тудуунуң шынзылгазы-биле шаңнатканнар. III-кү черге Кызыл кожуун төлептиг болуп, спортчу шөлчүгеш тудуунуң сертификадын ойнап алганнар. Спортчуларга ниитизи-биле 3, 8 сая рубльге шаңналдарны тывыскан.
Ол ышкаш янзы-бүрү маргылдааларның шылгалдаларын шыдажып эрткен, тускай шаңналдарга 1224 спортчу төлептиг болган. Спорт сайыды Субудай Монгуш оюннарның түңнелиниң байырлыг чыскаалынга дараазында чайгы оюннарны үш чыл болгаш эртерин база 2024 чылда кышкы оюннарның болурун дыңнаткан.
Алиса ДОНГАК.
Чуруктарны Спорт яамызының социал четкиде арынындан алган.
"Шын" №44 2023 чылдың июнь 17
