“Төп Азияның VI төөгү номчулгалары” бүгү-российжи эртем-практиктиг конференцияның ажылы бөгүн дооступ турар. Бо конференция Кызылга июнь 20–22 хүннеринде эрткен. Ооң ажылынга Тыва, Новосибирск, Красноярск, Пермь, Якутск, Санкт-Петербург, Москва, Абакан, Челябинск, Улан-Удэ, Иркутск, Черногорск хоорайлардан болгаш Казахстан Республикадан эртемденнер киришкен.
Конфренцияның ажыдыышкынынга ТР-ниң Чазааның Даргазының оралакчызы Орлан Сарыглар киришкеш, эртем чыыжының киржикчилери аалчыларны Тываның Баштыңы Владислав Ховалыгның өмүнээзинден байыр чедирип, Россия Мурнуу-Чөөн Азия күрүнелери-биле харылзааларны делгемчиде берген байдалга “Төп Азияның VI төөгү номчулгаларның” политиктиг ужур-дузазын ол демдеглээн.
Хаанныг Россияның хоргадалының адаанче Тываның киргениниң 110 чылында, Тыва Арат Республика ССРЭ-ниң составынче киргениниң 80 чылында бүгү Россия чергелиг эртем-практиктиг конференцияны Тыва Республикага эрттиргени база бир янзы ниитилел-политиктиг ужур-уткалыг.
Сибирь Федералдыг университеттиң Россияның Гуманитарлыг институдунуң төөгү кафедразының эргелекчизи, Россияның төөгү ниитилелиниң төлээзи, Красноярск хоорайдан Денис Гергилев конференцияның киржикчилеринге онлайн хевирге байыр чедиргеш, Россияның чоннарының төөгүзүн мегелеп күткүп, оларның эп-найыралын кошкадыр оралдажыышкыннар тыптып келгенде, Төп Азияның төөгүзүн эртемге шынныы-биле бадыткаарының политиктиг чугула ужур-утказын демдеглээн.
“Төп Азияның VI төөгү номчулгалары” бүгү-российжи эртем-практиктиг конференция “Төп Азияга чурттар аразынга харылзааларның төөгүзү”, “Төп Азия чоннарының этнокультурлуг харылзааларының айтырыглары”, “Төп Азияның чоннарының чүдүлгелериниң аразында харылзаалар” дээш өске-даа чеди секцияга Тываның күрүне университединге эрткен. Секцияларга илеткелдерни эртемденнер болгаш шинчилел ажылдарын чорудуп турар студентилер номчаан.
Таңды Тываның, Тыва Арат Республиканың, Тыва АО-нуң болгаш Тыва АССР-ниң төөгүзүнге хамаарыштыр илеткелдерни эртем-практиктиг конференцияга Тываның күрүне университединиң профессору Зоя Доржу, төөгү эртемнериниң кандидады Виктория Моңгуш, Тываның күрүне университединиң студентизи Чинчи Уйнук дээш өскелер-даа номчаан.
Тываның төөгүзүнүң дугайында илеткелдериниң аразындан Россияның Эртемнер Академиязының Чөөн чүк институдунуң профессору, төөгү эртемнериниң доктору Владимир Дацышенниң Кыдаттың Цин династиязының эрге-чагыргазының үезинде Тыва күрүне кылдыр хевирлеттинип эгелээн дугайында илеткели эртем-практиктиг конференцияның киржикчилериниң кичээнгейин хаара туткан.
Ийи хүн үргүлчүлээн эртем-практиктиг конференция үезинде эртемденнер болгаш шинчилекчилер Төп Азияның девискээринге болуп турган төөгүлүг болуушкуннар дугайында 87 илеткелди номчаан. Оларга хамаарыштыр бодалдар солчуушкуннары болгаш сайгарылгалар болган. Оон үндүрген түңнелдерни эртем-практиктиг конференцияның резолюциязынче киирген.
Ш. МОҢГУШ.
Буян ООРЖАКТЫҢ тырттырган чуруктары.
«Шын» №46 2024 чылдың июнь 22
