«Тыва-Экспо-2022» делгелгеден репортаж.
Садыг-саарылга болгаш чонга хандырылга чедирер адырда ылап-ла көскү чедишкиннерлиг улуска, чамдык организацияларга «Тыва Республиканыӊ Садыг-үлетпүр палатазы» 2021 чылда «Ажыкай Оюн» деп медаль тыпсырын бадылаан.
Оюн Ажыкай – Тываныӊ төөгүзүнде бодунуӊ карак кызыл ажылыныӊ ачызында 6 муӊ чылгылыг, 4 муӊ бода малдыг, 10 муӊ шээр малдыг, 200 тевелиг улуг хөреӊгитен кара-байларыныӊ бирээзи чораан. Ооӊ хову сыӊмас мал-маганын азырап карактаар кадарчылары, бөдүүн араттары безин 72 өглерге чурттап турган.
Мал болгаш чер ажылындан аӊгыда, чурттар аразынга садыглажылганы база уштап-баштап келген. Оюн Ажыкай орус, моол, кыдат садыгжы өӊнүктери-биле оларныӊ төрээн дылынга чугаалажыр. Ырадыр көрүүшкүннүг, онзагай салым-чаяанныг кижи болгаш Таӊды-Тыва чуртунуӊ сайзыралынга эгээртинмес ачы-дузаны чедирген.
Өске бай-дүжүметтерге деӊнээрге, Оюн Ажыкай бөдүүн чонга эвилеӊ-ээлдек, кам-хайыралыг, кижизиг бүдүжү-биле ылгалып чораан. Ынчангаш Бээзи кожууннуӊ Межегей чурттуг кара-бай Оюн Ажыкайныӊ төлептиг бүдүжүн мөӊгежитпишаан, амгы үеде ол ышкаш төлептиг, шылгараӊгай кижилерни шаӊнаар аӊгы медальды тургускан.
Дүүн, май 21-де, «Тыва-Экспо-2022» делгелгеге «Ажыкай Оюн» медальды тыпсыр ёзулал болуп эрткен.
Тывада биче болгаш ортумак сайгарлыкчы чорук адырында чедиишкиннери дээш «Ажыкай Оюн» медальды Кызыл хоорайда сарыг шажынныӊ улуг хүрээзин тудуп кылыр ажылды удуртуп турар Байбек Надажапович Монгушка («Строй-экспресс» ниителдиӊ бир тургузукчузун), Тыва болгаш Хакас республикаларда алдын казып тывар мурнакчы технологияларны шиӊгээдип ажылдап келген «Ойна» алдын тывыштыг артельдиӊ даргазы Олег Викторович Дудкога тывыскан.
Республиканыӊ экономиктиг хөгжүлдезиниӊ болгаш үлетпүр сайыдыныӊ хүлээлгезин күүседип турар Айдыс Сат биле Тывада Садыг-үлетпүр палатазының даргазы Аяс Мөӊге шаӊнатканнарга байыр чедирбишаан, улус-чоннуӊ амыдыралынга, чурттуӊ хөгжүлдезинге улуг үлүг-хуузун кииргени дээш өөрүп четтиргенин илереткен.
Р. Демчик.