Президент Владимир Путинниӊ саналы-биле национал төлевилелдерни 2019 чылда эгелээн.
«Кадыкшыл» национал төлевилелдиӊ шугуму-биле Мөӊгүн-Тайганыӊ Тоолайлыг сумузунда фельдшер-акушер пунктунуӊ тудуу доозулган дээрзин республиканыӊ Чазаанда төлевилелдер эргелели дыӊнадып турар.
200 кижи чурттакчылыг Тоолайлыг сумузу — Россия Федерациязыныӊ чаӊчылчаан ажыл-амыдыралын чорудуп турар эвээш санныг үндезин чоннуӊ даӊзызында.
— Ооӊ мурнунда эмчилээрде, кожуун төвүнче чоруп турган бис. Тоолайлыг биле Мугур-Аксы суурнуӊ аразы 66 км. Чаа эмнелге тудуп бергенинге аажок өөрүп тур бис. Бодунуӊ-даа, ажы-төлүнуӊ-даа кадыкшыл байдалын хынадып, эмчиниӊ кедилиг дузазын-даа көөрде, амыраан бис – деп, сарлык кадарчылары өөрүп чугаалаан.
«Кадыкшыл» национал төлевилелдиң бир кол угланыышкыны — баштайгы эмчи-санитарлыг дуза чедирер системаны сайзырадыры. Төлевилелдиӊ негелделеринге дүүштүр тудуп кылган эмнелге пунктузу амгы үениӊ эмчи дерилгези-биле шиметтинген, ишти — арыг-силиг, дашты — көрүштүг, чараш.
Бедик кашпал ортузунда биче суурнуӊ чурттакчылары эмчи-профилактиктиг шинчилгени аӊаа эртер.