Сибирьниң магистральдыг электри четкилериниң төлээлери-биле Тыва Республиканың Чазааның Даргазының оралакчызы Уран-оол Ондар чөвүлел хуралды эрттирген. Ак-Суг даг-руда болбаазырадылга комбинадын болгаш Тожу кожуунну магистральдыг электри четкилеринге кожарының айтырыгларын ол хуралга сайгарып чугаалашкан.
Магистральдыг четкилерге Ак-Суг даг-руда болбаазырадылга комбинадын болгаш Тожу кожуунну кожар электри шугумунуң төлевилел-шинчилел ажылдарын эгелээринге беленин Сибирьниң магистральдыг электри четкилериниң төлээлери илереткеш, шугумну шөйүп чорудар дилиндекти ыяштардан арыглаар талазы-биле ажылдар төлевилел-шинчилел ажылдарынга шаптыктап болурун дыңнатканнар. Чүге дээрге электри шугуму шөйлүп чоруур дилиндек Бии-Хем болгаш Тожу кожууннарның девискээринде арга-арыгны таварып эртер. Арга-арыгның ол девискээри арга-арыгның федералдыг фондузунга хамааржыр. Аңаа ыяштарны кезип, электри шугуму тудар дилиндекти аштаар дизе, ол девискээрде арга-арыгны ажыглалда, арга-арыг курлавырынче шилчидер ужурлуг. Ынчангаш Сибирьниң магистральдыг электри четкилериниң төлээлери бо айтырыгны шиитпирлээринге дузаны көргүзерин Тыва Республиканың Чазаандан дилээн.
Тожу кожуунче электри шугумун тудар талазы-биле төлевилел-шинчилел ажылдарынга деткимчени көргүзер, Сибирьниң магистральдыг электри четкилеринге дузалаар даалганы Тываның Арга-ыяш яамызынга болгаш Бойдус курлавырларының камгалал комитединге Тыва Республиканың Чазааның Даргазының оралакчызы Уран-оол Ондар берген. Даалга алган албан черлери Тывага улуг ужур-дузалыг электри шугумун Бии-Хем болгаш Тожу кожууннарның арга-арыгларын таварты тударынга чөпшээрел документилерни хоойлу-дүрүм ёзугаар белеткеп эгелей берген.
Бистиң корр.