ТР-ниң Дээди Хуралының даргазы Каң-оол Даваа чаңгыс чер-чурттугларынга Улуг Тиилелге хүнү-биле байыр чедирген:
📢Хүндүлүг чаңгыс чер-чурттугларым!
Хүндүлүг Ада-чурттуң Улуг дайынының хоочуннары, тылдың ажылчыннары!
Фашистиг Германияны баскан совет улустуң Улуг Тиилелгезиниң хүнүн каш хонгаш демдеглээр бис. Россияның чурттакчылары, а ол ышкаш чоокку даштыкы чурттарның хамаатылары – Улуг Тиилелгеге улуг үлүүн киирген улус ону бис-биле деңге төлептии-биле демдеглээр. Май 9-та Кызыл шөлге ээлчеглиг шериг чыскаал болуп эртер. Бүгү делегейниң кичээнгейи Москвада болур – олар российжи шеригниң күчү-күжүн база катап көөрлер.
Россия Федерациязынга 2022 чыл амыр эвес болуп тур. Чуртувус Украинаның, Донецк болгаш Луганск Улус Республикаларның девискээрлеринде тускай шериг операцияны дүн-хүн чок чорудуп турар. Ада-чуртувус АКШ баштаан барыын чурттарның сыгааны экономиктиг болгаш политиктиг дайыннарынга удур быжыы-биле турушпушаан. Оларның Россияга хөөн чок чоруу ылап илереп келген – украин националистерге акша-биле, чепсек-биле ажыт-чажыт чок дузалажып турлар.
Кызыл хоорайга база шериг парад болур. Аңаа 55-ки мотоадыгжы бригаданың дыка хөй солдаттары, сержантылары болгаш офицерлери база киржиксээрлер ийик. Ынчалза-даа олар Украина, Донецк болгаш Луганск девискээрлеринде шериг операцияда ийи ай ажыг үеде киржип турлар. Оларның дыка хөйү күрүне шаңналдарынга төлептиг болган. Ынчалза-даа хомуданчыг чүве – чамдык чаңгыс чер-чурттугларывысты бо шериг операция үезинде чидирдивис. Эрес-дидим маадырларывыс бистиң чүректеривиске мөңгеде артар. Мөчээн дайынчы оолдарывыстың өг-бүлелеринге чурттуң, а ол ышкаш Тываның Чазаа социал дузаны чедирип турар.
Чуртувус шериг операция чоруп турар девискээрлерниң чурттакчыларынга гуманитарлыг дузаны чедирип турар. Тыва база ооң кыйыында артпаан. Март–апрель айларда муң-муң тонна ачы-дуза барааннарын республиканың чону чыггаш чоруткан, ам-даа чорудар.
Улуг Тиилелге хүнү-биле Ада-чурттуң дайынының хоочуннарынга, а ол ышкаш тылдың ажылчыннарынга Дээди Хуралдың (парламентиниң) мурнундан байыр чедирерин чөпшээреп көрүңер. Кадыкшылды, аас-кежикти, тайбың амыдыралды силерге күзедим!