Совет медицинаның арга-дуржулгазынга чаңчыккан улус компьютеризация үезиниң чедиишкиннеринге белен-селен кайыын тааржырлар ийик – шүгүмчүлээр байдал дөмей-ле тыптып келир. Чогум эмчи биле аарыг кижиниң аразында харылзаа читкен деп аарыг кижилерниң шугулданыында чөптүг чүүлдер хөй, ону дарый эде көөрү черле шын. Россий медицинада чаартылгалар ам-даа доозулбаан болганда, айытканывыс четпесче үезинде эглип келири база кайы-даа талага барыктыг шиитпирлерни хүлээп алыры чугаажок.
Ооң бир чижээнге РФ-тиң Президентизи В.В. Путинниң шиитпири-биле хүлээп алдынган “Кадык камгалалы” национал төлевилел-биле медицинаның баштайгы чадазын чаартырының программазы ёзугаар республиканың сүмелээшкин-диагностика төвүнге «Эндомедиум” фирманың российжи артроскопия дериг-херексели чедип келгени хамааржыр.
«Тулган-на дериг-херексел- дир – деп, республиканың сүмелээшкин-диагностика төвүнүң кезип эмнээр амбулаторлуг төвүнүң эргелекчизи Шолбан Чооду чугаалап турар. – Кезип эмнээр болгаш диагноз тургузар дериг-херекселдерни хандырыкчының бодундан хүлээп алдым. Ону хүлээп алганының дугайында актыга ат салган дораан бистиң төпке чүстерни амгы үениң тускайжыттынган арга-хоргазы-биле эмнээр шинек көстүп келир».
Артроскопия дериг-херексели — ол дээрге чүстерге кезиишкинни чорудуп турда, ажыглаар тускайжыттынган дериг-херексел-дир. Ол шыңганнар бүрүзүн көстүрү тода камера-биле көөр арганы берип турар. Ооң дузазы-биле чүстерниң хан базыышкынын өйлээр, хан чокка аарыг чымчак шыңганнарны кезип кааптар арга тыптып келир.
«Артроскопия дериг-херекселиниң ачызында довуктуң, кажыктың сиириниң үзүлгенин тодарадыр, эмнээршинек биске тыптып келир» – деп, Республиканың сүмелээшкин-диагностика төвүнүң кезер эмчизи Адыгжы Монгуш тайылбырлап турар.
Республиканың сүмелээшкин-диагностика төвүнүң кезип эмнээр амбулаторлуг төвү хирургия, проктология, травматология, офтальмология болгаш урология талазы-биле планнаттынган кезиишкиннерни чорудуп турар. 2023 чылдың дургузунда 266 кезиишкинни чоруткан.
Бистиң корр.
Чуруктарны интернеттен алган.
“Шын” №14 2024 чылдың февраль 24
