ТР-ниң Дээди Хуралының (парламент) дөрткү ээлчеглиг Чөвүлел хуралы Чазак бажыңынга болган. Кожуун бүрүзүнүң төлээлери ук хуралга онлайн хевир-биле киришкен.
Хуралды ТР-ниң Дээди Хуралының депутады Артур Монгал удуртуп эрттирген. Аңаа Дээди Хуралдың Даргазы Тимур Даваа, Чазак Даргазының оралакчызының хүлээлгезин күүседип турар Айдың Чюдюк, кадык камгалал сайыды Анатолий Югай, күш-ажыл болгаш социал политика сайыдының оралакчызы Чечена Дудуп болгаш депутаттар киришкен.
Дээди Хуралдың Даргазы Каң-оол Даваа хуралды ажыдып сөс алган соонда, тус черлерниң чагыргалары-биле кады-ажылдажылга чорудар бөлүктерни Артур Монгал таныштырган. Ээлчеглиг чыышка өөредилге, кадык камгалалы, культура, аныяктар политиказы, спорт болгаш социал хөгжүлдеге хамаарышкан айтырыгларны, чуртталга-коммунал ажыл-агыйны болгаш хоорай тудуун харыылаар, бюджет, үндүрүг, экономика болгаш сайгарлыкчы чорук дээш саң-хөөге хамааржыр айтырыгларны, информастыг политиканы, көдээ черлерниң доктаамал сайзыралын болгаш үлетпүрнү харыылаары-биле алды аңгы бөлүктерни тускайлааш чаңгыс үн-биле бадылаан.
Оон аңгыда, тускай шериг операциязының киржикчилеринге болгаш оларның өг-бүлелеринге деткимче дугайында хуралга чугаалашкан. ТР-ниң кадык камгалал сайыды Анатолий Югайның медеглээни-биле алырга, республиканың беш эмнелгези тускай шериг операциязының киржикчилеринге психологтуг болгаш эмчи дузазын чедирип турар. Чаа үнүп келген 2023 чылда база ук ажылды уламчылаары планда көрдүнген.
«2023 чылдың январь 31-ге чедир 78 шеригжи эмчи дузазын алган. Амгы үеде республиканың 1 дугаар эмнелгезиниң хирургия салбырында 3 кижи эмнээшкинни ап чыдар. «Серебрянка» санаторийинге ниитизи-биле 74 кижи эмнээшкинни алган болза, оларның 61-и шериглер, а 13-ү тускай шериг операциязының киржикчилериниң чоок кижилери хамааржыр. Амгы үеде ук санаторийде беш шериг оолдар эмнээшкинни эртип турар» – деп, Анатолий Югай медеглээн.
Шериг операциязында киржип турар шериглерниң ал-бодунга болгаш өг-бүлелеринге чедирип турар деткимчелер дугайында ТР-ниң күш-ажыл болгаш социал политика сайыдының оралакчызы Чечена Дудуптуң илеткээни-биле алырга, 100 муң рубль деткимчени 696 тускай шериг операциязынга мобилизацияга таварышкан хамаатыларга, а беш муң рубльди адазы мобилизацияга таварышкан назы четпээн 897 уругга берген. Оларның өг-бүлелеринге көрдүнген аъш-чем аймаа болгаш дөгерер хойдан тургустунган наборну 618 өг-бүле алган. От салыр чер бажыңда чурттап олурар өг-бүлелер хөмүр-дашты болгаш оттулар ыяшты, а квартирада чурттап турарлар 10 муң рубль хемчээлдиг деткимчени алган. Тускай шериг операциязында киржип турар хамаатыларны машина-техника үндүрүүнден хостаанын база Чечена Дудуп демдеглээн.
Айдың ОНДАР.
Тускай шериг операциязының киржикчилеринге деткимче
6 февраля 2023
90