Тыва дыл хүнүнде Кызыл хоорайга чылдың эртер бот-тывынгыр театрлар аразынга “Уран чүүлдүң күзүңгүзү" деп республика чергелиг фестиваль-мөөрей болуп эрткен. Ооң киржикчилери тыва дыл кырынга шиилерни көрүкчүге бараалгаткан.
Беш шак чартык үе дургузунда алды шиини чүгле тыва дыл кырынга — Эрги-Барлыктың, Хову-Аксының, Чадаананың, Алдан-Маадырның, Шагаан-Арыг хоорайның, Мугур-Аксы суурнуң бот-тывынгыр театр бөлүктери көргүскен. Драмаларда болгаш комедияларда ынакшылды, өг-бүле харылзаазын, акы-дуңмалышкы хамаарылгаларны болгаш социал айтырыгларны көргүскен.
Улуг улустуң бот-тывынгыр театрларының аразынга болган мөөрейниң түңнелинде Гран-при шаңналын болгаш 30 муң рубльдиң сертификадын Чөөн-Хемчик кожууннуң Мерген-Херел Монгуш аттыг Культура бажыңы "Сес үүлгедиг" деп шиизи дээш алган.
Фестиваль-мөөрейниң тускай шаңналдарын дараазында киржикчилерге тывыскан: "Тергиин режиссура" деп шаңналды — Мөңгүн-Тайга кожууннуң культура болгаш дыштанылга төвүнүң "Мен дириг мен" деп драмазы дээш Алдын-Ай Сатка;
"Тергиин роль" шаңнал- ды — Мөңгүн-Тайга кожууннуң культура болгаш дыштанылга төвүнүң "Мен дириг мен" деп драмазынга кол ролю дээш Милана Биче-оолга;
"Тергиин ийиги роль" шаңналды — Шагаан-Арыг хоорайның "Элдеп-шоу" театр студиязының "Диирең" деп комедиязында ролю дээш Алевтина Доржукайга база Чеди-Хөл кожууннуң "Таңды-Уула" Культура бажыңының "Кыйгы" деп драмада ролю дээш Айрана Эренчинге;
"Поэтиктиг дыл" шаңнал- ды — Эрги-Барлык суурнуң улусчу театры "Ынакшыл болгаш килең дугайында ыры" деп драмазы дээш; "Чидиг социал теманы сойгалааны дээш" шаңналга — Алдан-Маадыр суурнуң Самбажык аттыг бот-тывынгыр театрының "Амыдыралдың эскиттери азы ховунуң “Хамнаарактары" драмазы төлептиг болган.
Чурукту болгаш медээни ТР-ниң Культура яамызындан алган.
“Шын” №85 2024 чылдың ноябрь 6
