Саяна ӨНДҮР, Тываның чогаалчылар эвилелиниң кежигүнү.
Эжимге
Ногаан бүрү аразындан
Оңган бүрү эскерип кааш,
Ээлчеглиг хунук күстүң
Эге демдээн шыгжап аар мен.
Кара доңат асфальтылап
Ажылымче далашса-даа,
Адыжымга азып келген
Харжыгашты дозуп аар мен.
Узун кыштың уйгузунда
Бир-ле дамды кыңгырт дээрге,
Бижииргексээн частың демдээн
Ол-ла дораан сактып аар мен.
Күстүң, кыштың, частың, чайның
Билдиртпес ол демдектерин
Күжүрүмнү өөртүр дээштиң,
Бир-ле дугаар чедирер мен.
Бойдус байлаа – сеткил байлаа
Шүлүкчү сээң чүрээң долган –
Бодум ону ээлээн болгаш,
Чогаалыңдан танып аар мен.
* * *
Ынакшылым дээринге
Сээң чүрээң сылдызы чоп
Ындыг дүрген өже берди?
Өскелерге чайынаажың
Эмин эрттир кыяң болуп,
Өскерилген баажызы чүл?
Сылдызы чок дээримге
Муңгаралым айдың айы
Чырып чорза, караңгы бе?
Адааргалдың бүргээринге
Аяс дээрим алыспайн,
Арыг чараш артып кагзын.
"Шын" №56, 2023 чылдың июль 29