Тыва Россияның регионнарының аразында турисчи аян-чоруктар өзүлдези-биле мурнаан

Росстаттың дыңнатканы-биле алырга, Тыва 2024 чылдың түңнели-биле Россияның регионнарының аразында турисчи аян-чоруктарның өскени-биле мурнуку одуругже үнген. Ол көргүзүгде Сибирь федералдыг округ база мурнакчы черни ээлеп турар. Россияның экономиктиг хөгжүлде сайыды Максим Решетников Сибирьде чаа турисчи төптерниң өзүлдезиниң угланыышкынын демдеглээн. Оларның бирээзинге Тыва база хамааржыр.

Регионалдыг туризм агентилелиниң дыңнатканы-биле алырга, эрткен чылдың 10 айында Тывага 2023 чылга деңнээрге, 80 муң хире хөй кижи аалдап келген. Республика Чазааның туризм инфраструктуразын хөгжүдер талазы-биле планныг ажылдааны, ооң иштинде аалчылар чурттаар өрээлдер санын болгаш туризм адырында сайгарлыкчыларның көвүдээни өзүлдеге идигни берген. Республиканың Баштыңы Владислав Ховалыгның идепкейлиг туружунуң ачызында федералдыг төптен улуг деткимчени алган.
2024 чылдың сентябрьда чурттуң Президентизи Владимир Путин ажыл-агый аайы-биле республикага кээп чорда, Тываның турисчи арга-шинээн күштелдирериниң дугайында айтырыгны чугаалашкан.

Москвага Владислав Ховалыг аңаа даянып, туризм адырында күрүнеден деткимче көргүзер аргалар талазы-биле ажылдаан. Экономиктиг хөгжүлде сайыды Максим Решетников-биле ужурашкаш, эптеп тургузар аалчылар бажыңнарын тударынче субсидияларны хаара тударын база чугаалашкан.

Чагытай биле Дус-Хөл хөлдерниң девискээрлерин чаайгайжытканы, оларны электри-биле хандырганы Тываже туристерниң агымын көвүдедиринге салдарлыг болган. Ол төлевилелдер Тыва Республиканың социал-экономиктиг хөгжүлдезиниң бот-тускайлаң программазын күүсеткениниң ачызында чедип алдынган. «Туризм болгаш аалчылар хүлээп алыр индустрия» национал төлевилел күүселдези-биле Чагытай, Азас хөлдерде, ол ышкаш Национал паркта пляжтарны дерээн.

Туризм агентилелиниң директору Буянзак Түлүштүң чугаазы-биле алырга, 2025 чылда Тывага туризм талазы-биле 20 ажыг төлевилелди боттандырып, турисчи объектилерни тудар база амгы үеде ажылдап турар черлериниң материал-техниктиг баазазын экижидер. Оон аңгыда, Пор-Бажың шивээзи-биле “Тарыс” аржаан девискээрлеринге экологтуг туризм программаларын хөгжүдеринге деткимчени көргүзер.