2025 чылдың март айда катап эгелээн 2 хуулуг «Тыва Республиканың девискээринде чиигелделиг ипотека» программазынга Дом.РФ банкызы киржир. Бо удаада чиигелделиг 2 хуулуг ипотеканың негелделерин «Ажы-төлдүг өг-бүлелерге ипотека» программазы-биле дөмейлээн. Ук программаның деткикчи оператору ДОМ.РФ болур.
«ДОМ.РФ-тиң ооң мурнунда федералдыг болгаш регионалдыг деткимче программазынга үре-түңнелдиг киришкени – чамдык хамаатыларга амгы үеде чурттаар оран-сава садып алырынга эптиг байдалдарны тургускан. Тыва Республиканың девискээринге 2 хуулуг чаарттынган ипотека программазы – дыка хөй чаш ажы-төлдүг өг-бүлелерге эң-не таарымчалыг байдалга чурттаар оран-сава садып алыр арга-дыр» – деп, ДОМ.РФ-тиң директору Светлана Некрасова демдеглээн.
Ажы-төлдүг өг-бүлелер Тывада чаа туттунуп турар хөй квартиралыг бажыңнардан квартираны азы чаа бажың тударынга чиигелделиг ипотеканы ап болур. Чээлиниң эң улуг хемчээли 6 сая рубль, а баштайгы төлевири 20 хуудан өрү. «Ажы-төлдүг өг-бүлелерге ипотека» федералдыг программазы-биле берген чээлилерниң хуузун республика бюджединден субсидия дамчыштыр чылда 2 хуу чедир немей эвээжедири программада көрдүнген. Чаа эгелээн чиигелделиг программа 2025 чылдың декабрь 31-ге чедир уламчылаар. Ооң мурнунда алган чээлилерниң катап акшаландырыышкыны (рефинансирование) программада көрдүнмээн.
«2023–2024 чылдарда Тывага чиигелделиг ипотека программазы тудуг адырынга эки салдарлыг болганы чугаажок. Амгы үениң негелделери-биле туттунган, чурттаарынга таарымчалыг оран-сава садып алыр арга бар апарган. Тываның Баштыңы Владислав Ховалыгның дилээ-биле чурттуң Президентизи Владимир Владимирович Путин бистиң республикавыска чиигелделиг ипотека программазын уламчылаарын деткээн. Ук программаны катап эгидер дээш, кылып чорудуп турган улуг ажылывыс адакталып, ДОМ.РФ-тиң деткимчезинче шилчииринге белен бис» – деп, ТР-ниң Чазааның Даргазының оралакчызы Олег Лукин демдеглээн.
ДОМ.РФ банкының сайтызында «РФ-тиң регионнарынга чиигелделиг ипотека» деп адырда программа езугаар чиигелделиг ипотека алыр дугайында билдириишкинни киирип болур.
«Банк барбайн-даа, онлайн хевирге билдириишкинни киирип болур. Кыдыг черлерде клиентилер-биле мобильдиг банкирлер болгаш курьерлер ажылдаар аргаларны тургустувус. Ук ажылдакчылар клиентиге эптиг үеде оларның күзээни черге чеде бээр. Клиент бодунуң смартфонун таварыштыр херек документилерге атты салыр. Ол ышкаш чээли алыкчыларынга документилер чыып, анкеталар долдурары албан эвес – клиентиниң чөпшээрели-биле күрүне ачы-дузазындан (госуслугиден) херек документилерни банк боду ап алыр» — деп, ДОМ.РФ банкының удуртукчулар чөвүлелиниң оралакчызы Алексей Косяков тайылбырлаан.
Бистиң корр.
Ада ТЮЛЮШТУҢ тырттырган чуруу.
“Шын” №10 2025 чылдың март 20
