ТР-ниң Аныяктар херектериниң талазы-биле агентилели база республиканың Спорт яамызы июньнуң 24-тен 27 хүннеринде Кызыл хоорайга болуп эртер хостуг хүрешке Россия чемпионадын организастап база эрттиреринге дузалажыр волонтерлар штавынче чыылданы чарлаан.
Бо чайның улуг спортчу болуушкунунга киржир күзелдиг кижилер https://dobro.ru/event/10185956 сайтыже киргеш, чагыгны арттырып болур. Эки турачыларга тускай өөредилгени болгаш белеткелди эрттирер.
Маргылдаа үезинде ооң шөлдериниң белеткели болгаш ажаап-тежээлдези, административтиг деткимче, түңнелдер болгаш протоколдар белеткели, болур-чогуур медээлер-биле хандырылга, спортчуларны база команда кежигүннерин үдээри, сервис-биле хандырары - волонтёрларның сорулгазы.
Маргылдаа хүннеринде эки турачыларны халас аъш-чем, тускай идик-хеп-биле хандырар.
Тыва Республиканың Аныяктар херектериниң талазы-биле агентилел база Тыва Республиканың Спорт яамызы чемпионаттың эрткен түңнелдери-биле волонтерларга тускай шактарны, өөрүп четтириишкин бижиктерин тыпсыр.
Тываның Баштыңы Владислав Ховалыг Тывага хостуг хүрешке Россия чемпионадын эрттирер инициативаны идип үндүрген турган. Ооң ол саналын Россияның Спортчу хүреш федерациязының президентизи Михаил Мамиашвили биле РФ-тиң камгалал сайыды Сергей Шойгу деткээн.
Кызылдың президентиниң кадет училищезиниң чиик атлетика манежинге ону эрттирерин баш бурунгаар Россияның Спортчу хүреш федерациязы-биле дугурушкан. Маргылдааны эрттирериниң улуг программазын белеткеп турар.
Маргылдаа хонуктарда республикаже 500 ажыг кижи келир. Оларның 350-и - Россияның аңгы-аңгы субъектилеринден маргылдааның киржикчилери, а 200 хире кижи – аалчылар болгаш төлээлер болур.