Июль 7-де Россияның Туризм талазы-биле федералдыг агентилелиниң удуртукчузу Зарина Догузова Тывага келгеш, республиканың Баштыңы Владислав Ховалыг-биле регионга туризмниң сайзыралының келир үезин сайгарып чугаалашкан.
Туризм талазы-биле агентилелдиң удуртукчузу «Сибирь каникулдары» турисчи маршрутта кирип турар объектилерге: «Азия төвү» культурлуг комплекске, чоокта чаа туттунган Хавырга дааның эдээнде Будда тураскаалынга, ол ышкаш Алдан-Маадыр аттыг Национал музейге база «Алдын-Булак» этнокультурлуг комплекске четкен.
Зарина Догузова аян-чоруунуң түңнелинде Тываның Баштыңы Владислав Ховалыг-биле ужурашкаш, республиканың онзагай бүдүштүг болгаш ховар культуразын магадап көргенин база регионда турисчи улуг күчү барын демдеглээн.
Ол ышкаш Ростуризмниң удуртукчузу Тываның Баштыңы-биле турисчи инфраструктураның хөгжүлдезиниң айтырыгларын, Чагытай хөлде турисчи объектилерни калбартыр арга барын болгаш аалчылар бажыңнарын көвүдедир планны сайгарып чугаалашкан.
Тываның Баштыңы Владислав Ховалыг Зарина Догузованың аалдап келгенинге өөрүп четтиргенин илереткеш, регионнуң Чазаа туристерге таарымчалыг байдалды тургузар талазы-биле ажылдап турарын дыңнаткан.
ТР-ниң Чазааның парлалга албаны.