РФ-тиң Чазааның июль 24-те 1202 дугаарлыг доктаалын езугаар федералдыг бюджеттен Тыва Республиканың бюджединче 2023 чылда бюджеттер аразының трансферттерин бээриниң Дүрүмүн бадылаан. Аңаа дүүштүр Тыва Республиканың девискээринге чиигелделиг ипотека программазын боттандырары-биле акша-хөреңгилерни РФ-тиң Чазааның курлавыр фондузундан үндүрүп бээр болган. Мындыг шиитпирге хамаарыштыр Тываның Баштыңы Владислав Ховалыг соцчеткилерде бодунуң арынынга бижээн.
“Тыва Республиканың иштинге чиигелделиг ипотека турар дээрзин өөрүшкүлүг дыңнадып тур мен. Бистиң Президентивис Владимир Владимировичниң база Чазак Даргазы Михаил Владимировичниң ачызында ук сорулгалар амыдыралга херек кырында боттанып эгелээн. Адырлар аайы-биле яамыларга бүдүн чылдың дургузунда ону чугаалажып, сайгаржып, бодувустуң туружувусту, шынныывысты камгалап келдивис. Бо-ла болгай, РФ-тиң Чазааның үрде манаанывыс доктаалы үнүп келди.
Бо чылын бис 801 ипотека чээлизинге көрдүнген 250 сая рубльди алыр бис. ТР-ниң Чазааның экономиктиг адырынга (Донских) банк структуралары болгаш тудугжулар-биле кады чиигелделиг ипотеканы бээриниң айтырыгларын чонга калбаа-биле дыңнадып чедирерин даастым. 2024 чылда ам-даа 550 ипотека чээлизинге деткимчени алыр сорулганы салып турар бис. Чазак Даргазы Михаил Мишустинниң дыңнатканы дег, Ыраккы Чөөн чүктүң ипотеказының үлегер-майыы-биле дараазында чылдарда ону узадыр, ындыг болганда бистиң программавыстың үр хуусаалыг апаарынга кордап турар бис.
Бо деткимчени аңаа езулуг хереглелдиг кижилер ажыглаары чугула. Чиижеңнерге болгаш ажык-кончаазырактарга маңаа чер турбас ужурлуг. Мындыг улуг хемчээлдиг ажылды бистиң чаңгыс чер чурттугларывыска таарымчалыг байдалдарны тургузар дээш, хөй аал чурттаар бажың-балгаттарның тудуунга идиг бээр дээш, кылып чоруткан болгай. 2 хуулуг чээли салыышкыннарының ачызында ажыл-ишчи оруунуң эгезинде турар аныяк өг-бүлелер, кедилиг специалистер чурттаар оран-саваны чогумчалыг өртекке садып ап болур апаар. Ооң уламындан олар төрээн республиказынга артып калыр болгаш ооң тургустунуушкунунга база сайзыралынга бүгү күжүн үндүрерлер” — деп, Тываның Баштыңы бижип турар.
А. ХЕРТЕК белеткээн.
Ада ТЮЛЮШТУҢ тырттырган чуруктары.
"Шын" №55, 2023 чылдың июль 26