Тыва үндезин ак чем кылыгларының мөөрейи бир дугаар 2018 чылда болган. Хамчыктыг коронавирустуң хайындан мөөрей ийи чыл үзүктелген соонда, ам август 14-те малчыннарның Наадым байырлалында болур. Үш дугаар болур мөөрейге киржир күзелдиг тыва ак чем бүдүрүкчүлериниң чагыгларын август 10-га чедир хүлээр.
Экологтуг арыг ак чемни, кадык чемненилгени нептередир болгаш сүт кылыглары бүдүрүп турар сайгарлыкчыларны деткиир сорулга-биле «Ак чем» мөөрейин эрттирип турар.
Мөөрейге киржири-биле сүт болбаазырадыр талазы-биле көдээ ажыл-агый адырында ажылдап турар кижилерни болгаш хөй-ниитиниң чемненилгезин хандырып турар сайгарлыкчыларны чалап турар. Мөөрейниң кол негелдези – бүдүрүп турар сүт болгаш сүт кылыглары Россияның болгаш Евразияның стандарттарынга, санитар-гигиена нормаларынга дүгжүп турар ужурлуг.
«Ак чем» мөөрей-фестиваль Кызылдың Арат шөлүнге болур. Мөөрейниң киржикчилери боттарының сүттен кылган аъш-чемин болгаш кылган продукциязының технологтуг картазын таныштыргаш, жюри кежигүннеринге амданын шенээр арганы бээр. Ак чемниң даштыкы хевирин, амданын, өңүн, чыдын дээш өске-даа көргүзүглерин үнелеп көөр.
Тиилекчилерни «Үндезин сүт кылыгларының хөй ассортиментизи дээш», «Национал хүндүткелди тергиин суртаалдааны дээш», «Национал сүт кылыгларын тергиин таныштырганы дээш» база «Улусчу жюри» деп номинацияларга илередип шаңнаар. Тиилекчилерни дипломнар, өртектиг белектер болгаш акша шаңналдары манап турар.